Për shkak të reshjeve në orët e vona të pasdites dhe mbrëmjes së djeshme, niveli i lumit Markova është ngritur duke dalë nga shtrati në disa pjesë në fshatin Batincë të Komunës së Studeniçanit në Maqedoninë e Veriut, raporton Anadolu.
Shërbimet e Komunës së Studeniçanit njoftuan se dalja e lumit nga shtrati ka shkaktuar dëme duke përmbytur disa shtëpi, depo dhe objekte industriale në fshatin Batincë.
Duke folur për gazetarët, kryetari i Komunës së Studeniçanit, Azem Sadiki tha se mbrëmë situata në fshatin Batincë ka qenë e tmerrshme, me dëme nëpër oborret e shtëpive dhe brenda shtëpive, por pa viktima në njerëz.
“Mbrëmë situata ka qenë e tmerrshme. Lumi Markova ka pasur rrjedhje të madhe të ujit dhe në disa vende lumi ka dalë (nga shtrati) dhe ka vërshuar disa oborre dhe shtëpi. Diku rreth dhjetëra shtëpi janë përmbytur, por për fat të mirë nuk kemi dëme më të mëdha dhe viktima në njerëz”, tha Sadiki.
Ai theksoi se që nga fillimi ekipet e shërbimeve komunale, në mbështetje me kompanitë private, filluan punën për të parandaluar derdhjen e mëtejshme të lumit. Sadiki njoftoi se kanë arritur të stabilizojnë situatën dhe aktualisht niveli i lumit ka rënë në krahasim me mbrëmë.
Lumi ka dalë nga shtrati edhe në urën e Luboshit në hyrje të fshatit Batincë, e cila ka pësuar dëmtime të vogla duke u mbyllur për kalim, por kreu i Studeniçanit tha se sipas vlerësimeve të autoriteteve kompetente tani mund të lëshohet për përdorim.
Sadiki gjithashtu tha se pasi të pastrohen dëmet nga shiu i mbrëmshëm, do të nevojitet një projekt për të sanuar urën e Luboshit dhe për të rregulluar shtratin e lumit Markova, që në të ardhmen fshati të mos pësojë dëme të ngjashme.
Raportohet se përveç në fshatin Batincë, përmbytje me dëme më të vogla janë shënuar edhe në Lubosh, Pintija, Lisiçe e Epërme dhe Lisiçe e Poshtme.
