Steve Witkoff, përfaqësuesi i posaçëm i presidentit amerikan Donald Trump për Lindjen e Mesme, raportohet se do të vizitojë Izraelin për të diskutuar fazën e dytë të marrëveshjes së armëpushimit të arritur midis Tel Avivit dhe Hamasit në Rripin e Gazës, transmeton Anadolu.
Sipas transmetuesit izraelit ‘Channel 12’, Witkoff javën e ardhshme do të udhëtojë në Arabinë Saudite dhe më pas në Izrael.
Theksohet se gjatë vizitës së tij në Izrael do të diskutohen negociatat për fazën e dytë të armëpushimit mes Tel Avivit dhe Hamasit.
Witkoff në një program në ‘Fox News’ njoftoi se do të merrte pjesë në “inspektimin” e Korridorit Netzarim dhe Korridorin e Filadelfit që ushtria izraelite i ka pushtuar në Gaza.
– Marrëveshja për armëpushim dhe shkëmbim të pengjeve Izrael-Hamas
Më 15 janari, Katari, një nga vendet ndërmjetësuese, njoftoi se Izraeli dhe Hamasi arritën një marrëveshje për një armëpushim dhe shkëmbim të pengjeve në Gaza.
Marrëveshja hyri në fuqi të dielën e kaluar, më 19 janar. Në 42 ditët e para të marrëveshjes së armëpushimit, që përbëhet nga tre faza, do të lirohen 33 pengje izraelite dhe mbi 1.900 të burgosur palestinezë.
Më 19 janar, Brigadat Al-Qassam, krahu ushtarak i Hamasit, në kuadër të fazës së parë të marrëveshjes i dorëzuan ekipit të Kryqit të Kuq tre pengje femra izraelite.
Ndërkohë, 90 palestineze të mbajtura në burgjet izraelite u liruan nga burgu ushtarak Ofer që ndodhet në Bregun Perëndimor të pushtuar.
