Dashuria për atdheun është intuitë me të cilën kemi lindur, deri aty sa që ne shohim edhe zogun shtegtar të etur për atdheun, tek sa një ditë i kthehet atij.
Atdheu është ajo copë toke në të cilën kemi lindur dhe jemi rritur, dëshmitar i gëzimeve dhe hidhërimeve tona, zemra ngjitet pas tij…
Sa do që endemi përreth e sytë mund të na mbushen me magjepsje nga ajo që shohim, ne prapë mbetemi të lidhur me tokën ku na ka rrahur për herë të parë zemra.
Dashuria e atdheut krahas nostalgjisë për te, mbart në vete edhe ndjenjën e përgjegjësisë karshi tij.
Ne lindëm në tokën e tij dhe u ushqyem me të mirat e tij, ndaj nëse përkatësia ndaj tij është nder, besnikëria mbetet detyrim!
Përkatësinë e mirëfilltë për atdheun ne e mësuam nga prindërit dhe gjyshërit tanë! Na ishte dashuri pa kusht e pa ambicie për të fituar avantazhe. Shumica prej tyre nuk i përkisnin asnjë partie politike. Pa zhurma të thata, ishin në gjendje të sakrifikonin çdo gjë për te! Të tillë burra e këso dashurie do të ketë në çdo kohë. Jemi dëshmitarë dhe kemi parë e shohim edhe sot.
Kur flasim për të tashmen, jemi dëshmitarë po ashtu të një kategorie njerëzish te të cilët atdhedashuria është e kushtëzuar. Të tillët patriotizmin e kanë të shtrirë në drejtim të interesave të tyre e jo interesave të atdheut. Dashuri që ka kaluar nga niveli i pastër intuitiv në nivelin e interesave personale. Të flasin për patriotizëm por në veprimet e tyre vetëm patriotizëm nuk gjen. Flasin për drejtësi, por qeverisen nga drejtësia e interesave të tyre. Flasin për ligje por janë të parët që i shkelin ato.
Atdheut i duhen shpirtra të sinqertë e të dëlirë, për ta ndërtuar dhe ngritur lart në mesin e vendeve të përparuara. Shpirtra nga të cilët burojnë shumë vepra e pak fjalë e parulla.
Në kohë paqeje, edhe ruajtja e pastërtisë është patriotizëm, përmbushja e detyrimeve në vendin e punës është patriotizëm, respektimi i ligjit dhe rendit publik është patriotizëm, mbështetja e nevojtarëve është patriotizëm…
Kur flasim për patriotizëm e atdhedashuri le t’i bëjmë ato qëndrime e veprime paraprakisht!
Allah ruaje atdheun tonë, ruaji ata që e duan ate njëmend!
Amin
Dr. Besim Arbanashi
