Parlamenti i Turqisë dje ratifikoi Marrëveshjen e Parisit për Klimën për të kontribuar në përpjekjet globale kundër ndryshimit të klimës, transmeton Anadolu Agency (AA).
Të gjitha partitë politike në parlament votuan “pro” miratimit të marrëveshjes.
Më 12 dhjetor 2015, palët e Konventës Kornizë të OKB-së për Ndryshimet Klimatike arritën një marrëveshje për të luftuar ndryshimet klimatike dhe për të arritur një të ardhme të qëndrueshme me karbon të ulët në Konferencën e OKB-së për Ndryshimet Klimatike (COP21) në Paris.
Marrëveshja e Parisit, e përcaktuar si “një urë midis politikave të sotme dhe neutralitetit ndaj klimës para fundit të shekullit 21”, kërkon të forcojë reagimin global ndaj kërcënimit të ndryshimit të klimës duke ndaluar rritjen e temperaturave mesatare globale më shumë se 2 gradë Celsius mbi nivelet paraindustriale gjatë shekullit të ardhshëm dhe për të vazhduar përpjekjet për të kufizuar rritjen e temperaturës edhe më tej në 1,5 gradë Celsius nëse është e mundur. /aa
