Papa Françesku u bëri thirrje vendeve që të pranojnë refugjatët afganë të cilët janë në kërkim të një jete të re. Ditën e sotme, nga Sheshi i Shën Pjetrit në Vatikan, Papa Françesku u lut që personat e zhvendosur brenda Afganistanit të marrin ndihmë dhe mbrojtje.
“Në këto momente kur afganët po kërkojnë strehim lutem që shumë vende të mirëpresin dhe mbrojnë të gjithë ata që kërkojnë një jetë të re”, tha Papa Françesku.
Shtetet e Bashkuara më 30 gusht përfunduan tërheqjen e plotë nga Afganistani pas 20 vjetësh të prezencës ushtarake atje. Vendi tashmë është nën kontrollin e talebanëve dhe shumë afganë e kanë të paqartë të ardhmen e tyre nën sundimin taliban.
