Mijëra palestinezë kanë kryer lutje dhe kanë falur namazin e teravisë në Xhaminë Al-Aksa gjatë Natës së Kadrit, pavarësisht pengesave të vendosura nga Izraeli në Kudsin Lindor të pushtuar, raporton Anadolu.
Më herët, mijëra palestinezë gjithashtu çelën iftar duke thyer agjërimin në kompleksin e Xhamisë Al-Aksa para Kupolës së Shkëmbit.
Pavarësisht kufizimeve të vendosura nga forcat izraelite, muslimanët palestinezë u dyndën në Al-Aksa për të shënuar Natën e Kadrit, e cila konsiderohet më e virtytshme se një mijë muaj.
Që nga fillimi i sulmeve izraelite në Bregun Perëndimor në muajin janar, të paktën 70 palestinezë janë vrarë dhe mijëra janë zhvendosur.
Tensionet kanë qenë të larta në të gjithë Bregun Perëndimor, pas fillimit të luftës në Gaza në tetor të vitit 2023. Që atëherë, në Bregun Perëndimor janë vrarë të paktën 983 palestinezë dhe rreth 7 mijë të tjerë janë plagosur nga sulmet e ushtrisë izraelite dhe kolonëve të paligjshëm.
Kjo natë, e cila është një nga netët më të rëndësishme të kalendarit islam dhe sipas mësimeve islame konsiderohet më e vlefshme se një mijë muaj, është në dhjetë ditët e fundit të muajit të Ramazanit, muajit më të rëndësishëm të kalendarit islam, i cili mbyllet me festën e Fitër Bajramit të dielën.
