Grupi ndërministror qeveritar dhe kompania koncesionare e rrugës Milot-Morinë kanë përmbyllur procesin e negociatave, duke dalë me një formulë konkrete për tarifimin preferencial të banorëve të qarkut të Kukësit, autobusëve të linjës dhe përdoruesve të shpeshtë.
Burimet nga grupi negociator bëjnë të ditur se të gjitha automjetet e regjistruara në qarkun e Kukësit do të paguajnë një tarifë prej 100 lekë me TVSH për një kalim. Përdoruesit e qarkut të Kukësit do të parablejnë përmes ‘Telepass’, në mënyrë të përshkallëzuar deri në 44 kalime në muaj me këtë tarifë të reduktuar.
Reduktimi i tarifës do të aplikohet edhe për linjat e transportit publik, që kryejnë udhëtime nga dhe për në qytetin e Kukësit. Tarifa e tyre e kalimit do të jetë gjithashtu 100 lekë me TVSH për një kalim. Kategoria e tretë përfituese e tarifave të lehtësuara është ajo e përdoruesve të shpeshtë të rrugës, ku përfshihen qytetarët e Shqipërisë dhe ata të Kosovës, të cilët e përdorin aksin rrugor në mënyrë të vazhdueshme.
Parimi i vendosur është ai i reduktimit të tarifës në varësi të numrit të udhëtimeve. Sa më shumë të udhëtosh, aq më shumë përfiton nga ulja. Fatura për politikat lehtësuese do t’i kaloje buxhetit të shtetit, i cili për 30 vite do t’i paguajë koncesionarit 48.5 milionë euro.
Aplikimi
Tarifa në Rrugën e Kombit do të rinisë në 17 shtator dhe për frekuentuesit e shpeshtë do të ketë ulje nga 10% deri në 40% në varësi të numrit të kalimeve në një muaj. Sa më shumë të udhëtojë një qytetar apo një biznes, aq më shumë ulje përfiton, e cila varion nga 10% në 40%. Tarifa e kalimit në rrugën Durrës-Kukës u vendos për herë të parë në fillim të muajit prill në masën 5 euro për një kalim ose 10 euro vajtje-ardhje. Kjo pagesë u kundërshtua nga banorët për të cilët në kontratën e koncesionit parashikohej që të kishte lehtësira, por vetëm 6 muaj pas hyrjes në fuqi të taksës derisa të identifikoheshin përdoruesit e shpeshtë.
Kjo çoi në zemërimin e qytetarëve të Kukësit, të cilët dy ditë pas vendosjes së taksës protestuan duke djegur pikën e kalimit me pagesë. Pavarësisht këtyre lehtësirave, banorët e Kukësit dhe drejtuesit vendorë kanë kërkuar që pagesa për ta të jetë 0 lekë. Tarifa për qytetarët e tjerë do të mbetet 5 euro, por do të ofrohet ulje në bazë të numrit të frekuentimeve. Vendosja e tarifës u shty pas sezonit turistik, edhe si pasojë e kërkesës së bërë nga bizneset kosovare dhe përfaqësuesit e qeverisë, në mënyrë që të mos rezultonte një barrë më tepër për pushuesit që vijnë nga Kosova.
Zbritje për përdoruesit e shpeshtë
1.Nga 10 deri në 30 kalime në muaj,
përdoruesi i shpeshtë përfiton zbritje në masën 10%.
2.Mbi 30 deri në 50 kalime në muaj,
përdoruesi i shpeshtë përfiton zbritje në masën 20%.
3.Mbi 50 deri në 60 kalime në muaj,
përdoruesi i shpeshtë përfiton zbritje në masën 30%.
4. Mbi 60 kalime në muaj,
përdoruesi i shpeshtë përfiton zbritje në masën 40%.
