Sipas një raporti të Kombeve të Bashkuara (OKB), Izraeli që nga 7 tetori ka “goditur drejtpërdrejt” 212 shkolla në Rripin e Gazës, transmeton Anadolu.
Sipas një raporti nga Fondi i OKB-së për Fëmijët (UNICEF), së bashku me organizatat Education Cluster (GEC) dhe Save the Children, imazhet satelitore treguan të paktën 53 shkolla që janë “shkatërruar plotësisht” që nga shpërthimi i konfliktit dhe një rritje pothuajse 9 për qind të sulmeve në ambientet e shkollave që nga mesi i muajit shkurt.
Raporti tha se “tendenca e lartë e sulmeve ndaj objekteve shkollore” ka përkeqësuar situatën tashmë të rëndë humanitare në Gaza.
Nga gjithsej 563 ndërtesa shkollore në Rripin e Gazës, theksohet në raport, 165 nga 212 që u goditën drejtpërdrejt janë zonat e përcaktuara për evakuim nga ushtria izraelite.
“Të dhënat tregojnë se 62 shkolla janë shënjestruar drejtpërdrejt në provincën jugore Khan Younis, 14 në rajonin e mesëm, 94 në provincën e Gazës dhe 42 në veri të Gazës, e cila është zona më e prekur deri më tani, me 86,2 për qind e ndërtesave shkollore ose të goditura drejtpërdrejt ose të dëmtuara”, thuhet në raport.
Më shumë se një në dy objekte shkollore të udhëhequra nga Agjencia e OKB-së për Refugjatët Palestinezë (UNRWA), gjithashtu janë goditur që nga 7 tetori.
“Asnjë arsim nuk po zhvillohet fare në Gaza për gati gjashtë muaj”, njoftoi UNRWA.
“Përdorimi ushtarak i shkollave” nga Izraeli
Sipas raportit, gjetjet shtesë të nxjerra nga imazhet satelitore dhe burime të tjera “sigurojnë prova për përdorim ushtarak të shkollave” nga Forca e Sigurisë e Izraelit (ISF) “që nga fillimi i përshkallëzimit”.
“Kjo përfshin disa raporte, fotografi dhe video që tregojnë se shkollat po përdoren për operacione ushtarake nga ISF-ja, duke përfshirë përdorimin si paraburgim, qendra të marrjes në pyetje dhe baza ushtarake. Fotot satelitore në raport gjithashtu treguan tanke ushtarake, gjurmët e tyre dhe krateret nga granatimet në ambientet e shkollës në shkurt”, thuhet në raport.
Raporti theksoi se më shumë se 320 ndërtesa shkollore, 188 prej tyre të goditura drejtpërdrejt dhe 98 të dëmtuara, janë përdorur nga banorët e zhvendosur si strehimore që nga 7 tetori.
Sapo të përfundojë konflikti, thuhet më tej, të paktën 67 për qind e shkollave në Gaza” do të kenë nevojë për rindërtim të plotë ose punë të mëdha rehabilituese për të funksionuar përsëri”.
Izraeli po kryen ofensivën ushtarake në Gaza që nga sulmi ndërkufitar nga grupi i rezistencës palestineze Hamas më 7 tetor, kur sipas Tel Avivit u vranë rreth 1.200 njerëz.
Që atëherë, të paktën 32.200 palestinezë janë vrarë dhe sulmet kanë shkaktuar një shkatërrim masiv, zhvendosje të palestinezëve dhe uri.
Izraeli akuzohet për gjenocid në Gjykatën Ndërkombëtare të Drejtësisë, e cila në një vendim të përkohshëm në muajin janar urdhëroi Tel Avivin të ndalojë aktet e gjenocidit dhe të marrë masa për të garantuar ofrimin e ndihmës humanitare për civilët në Gaza.
