OKB-ja njoftoi të premten se ka pezulluar të gjitha lëvizjet brenda dhe drejt zonave të kontrolluara nga forcat Houthi në Jemen, pasi më shumë pjesëtarë të stafit të saj u arrestuan në kryeqytetin Sana.
“Dje (të enjten), autoritetet de facto në Sana (Houthit) arrestuan shtesë personel të OKB-së që punojnë në zonat nën kontrollin e tyre”, thuhej në një deklaratë të organizatës.
Për të garantuar sigurinë e personelit të saj, OKB-ja ka pezulluar “të gjitha lëvizjet zyrtare drejt dhe brenda zonave nën kontrollin e autoriteteve de facto. Ky vendim do të mbetet në fuqi deri në një njoftim të dytë,” thuhet më tej në deklaratë.
Organizata njoftoi se zyrtarët e saj në Jemen “po angazhohen aktivisht me përfaqësues të lartë të autoriteteve de facto, duke kërkuar lirimin e menjëhershëm dhe pa kushte të të gjithë personelit dhe partnerëve të ndaluar.”
Deklarata nuk specifikoi numrin apo kombësitë e personave të arrestuar. Grupi Houthi ende nuk ka komentuar mbi këtë çështje.
Në qershor 2024, Sekretari i Përgjithshëm i OKB-së Antonio Guterres bëri thirrje për “lirimin e menjëhershëm dhe pa kushte” të 17 punonjësve të OKB-së të ndaluar në Sana, përfshirë 13 të arrestuar gjatë atij muaji dhe katër të mbajtur midis viteve 2021 dhe 2023.
Megjithatë, Houthit pretendojnë se nuk kanë asnjë problem me punonjësit e OKB-së dhe akuzojnë të ndaluarit se janë “të dyshuar për spiunazh për ShBA-të.”
Grupi gjithashtu ka mbajtur për tre vite rreth 20 punonjës jemenas të Ambasadës Amerikane në Sana. Ambasada pezulloi operacionet e saj në vend në vitin 2014.
Jemeni mbetet i zhytur në një nga krizat më të rënda humanitare dhe ekonomike në botë, e nxitur nga pothuajse një dekadë luftë midis forcave qeveritare dhe Houthive.
Lufta në Jemen ka marrë mbi 150.000 jetë njerëzish dhe ka shkaktuar një nga krizat më të rënda humanitare globalisht, duke sjellë dhjetëra mijëra vdekje shtesë.
