Agjencia e OKB-së për refugjatët palestinezë (UNRWA) lëshoi një paralajmërim urgjent për ndalesën e afërt izraelite që mund të dëmtojë aftësinë e saj për të ofruar shërbime thelbësore për miliona refugjatë palestinezë në Gaza, Bregun Perëndimor dhe Kudsin Lindor, transmeton Anadolu.
Zëdhënësja e UNRWA-së Juliette Touma tha për RTE-në e Irlandës të premten se koha po mbaron, pasi ndalimi pritet të hyjë në fuqi në fund të janarit pas një vendimi të parlamentit izraelit tetorin e kaluar.
“Ora po shkon drejt ndalimit të mundshëm të UNRWA-së për të ofruar shërbime thelbësore për miliona refugjatë palestinezë”, tha Touma, duke theksuar se OKB-ja nuk ka plane për të zëvendësuar agjencinë në territoret e pushtuara.
“Ajo që duhet të ndodhë është që parlamenti izraelit të tërheqë vendimin”, shtoi ajo.
Touma theksoi se një veprim i tillë do të ishte i paprecedentë në historinë e OKB-së. “Nuk ka ndodhur kurrë në historinë e Kombeve të Bashkuara që një shtet anëtar të vendosë të ndalojë një agjenci të OKB-së, në mes të një lufte, të bëjë punën e saj”, tha ajo.
Knesseti, ose parlamenti izraelit, votoi tetorin e kaluar për të ndaluar operacionet e UNRWA-së në zonat nën kontrollin izraelit, duke përmendur pretendimet se disa punonjës të agjencisë ishin përfshirë në sulmet e 7 tetorit 2023, një akuzë që agjencia e mohon.
Nëse zbatohet, ndalesa do të çonte në mbylljen e zyrave të UNRWA-së dhe ngrirjen e llogarive të saj financiare në Izrael, duke ndalur efektivisht operacionet e saj.
E themeluar pas Nakbas (Katastrofës) së vitit 1948, UNRWA ka qenë një mjet jetësor për refugjatët palestinezë, duke ofruar shërbime për afro 5,9 milionë individë në gjithë Gazën, Bregun Perëndimor, Jordani, Siri dhe Liban.
Që nga tetori i vitit 2023, fushata ushtarake e Izraelit në Gaza ka rezultuar në më shumë se 45.700 vdekje, shumica prej tyre gra dhe fëmijë, pavarësisht nga një rezolutë e Këshillit të Sigurimit të OKB-së që bën thirrje për një armëpushim të menjëhershëm.
Në nëntor, Gjykata Ndërkombëtare Penale (GJNP) lëshoi urdhra arresti për kryeministrin izraelit Benjamin Netanyahu dhe ish-ministrin e Mbrojtjes Yoav Gallant për krime lufte dhe krime kundër njerëzimit në Gaza.
Izraeli po përballet gjithashtu me një çështje gjenocidi në Gjykatën Ndërkombëtare të Drejtësisë për sulmin e tij të vazhdueshëm ndaj Gazës.
