Zyra e OKB-së për të Drejtat e Njeriut (OHCHR) thotë se është gjithnjë e më e shqetësuar se veprimet e ushtrisë izraelite në Gazën veriore “mund të jenë duke shkaktuar shkatërrimin e popullsisë palestineze përmes vdekjes dhe zhvendosjes”.
Ky është veçanërisht rasti rreth Jabalia, Beit Lahiya dhe Beit Hanoon, tha OHCHR, duke shtuar se autoritetet izraelite penguan hyrjen e të gjitha furnizimeve thelbësore në Gazën veriore midis 1 dhe 14 tetorit.
“Pas 15 tetorit, një sasi simbolike e ndihmave duket se ka hyrë në veri, por kjo nuk është në përpjesëtim me nevojat e popullsisë.”
Zyra e OKB-së tha gjithashtu se ushtria u tha njerëzve të largoheshin nga Gaza veriore, por në të njëjtën kohë vazhdoi të bombardonte dhe sulmonte zonën, duke e bërë të rrezikshme për civilët ikjen.
Njoftimi shtoi se:
Ajo ka marrë raporte se palestinezët janë shënjestruar gjatë arratisjes.
Trupat izraelite shkatërruan ndërtesa banimi dhe sulmuan shkollat që shërbenin si strehimore.
Ushtria izraelite rifilloi sulmet në dy nga tre spitalet kryesore në veri të Gazës.
Ekipet e shpëtimit dhe mjekët vazhdojnë të raportojnë kufizime dhe sulme direkte dhe indirekte nga ushtria izraelite, duke penguar operacionet për shpëtimin e jetës.
Shërbimet e internetit në Gazën veriore janë ndërprerë që nga 19 tetori.
Të paktën tre gazetarë palestinezë janë vrarë në dy javët e fundit.
Raportet tregojnë gjithashtu se dhjetëra burra palestinezë po merren në paraburgim nga ushtria izraelite. /mesazhi
