Ka nisur regjistrimi i nxënësve në shkolla të mesme në vendin tonë, derisa avokati kosovar Arianit Koci, përmes një postimi në FB ka thënë gjatë kësaj kohe ka kontaktuar me disa nxënëse të cilat mbajnë shami në kokë, në të cilat i kanë rrëfyer se nuk u është lejuar mësimnxënia.
Avokati ndër të tjera thotë se mbulesa islame në shkolla nuk mund të ndalohet me udhëzime administrative, pasi që një gjë të tillë e garanton Kushtetuta e vendit.
Ky është postimi i plotë:
Mbulesa islame në shkolla mund të ndalohet vetëm me ligj
Këtë javë është afati për regjistrimin e nxënësve në shkolla të mesme në Kosovë. Me entuziazëm e dëshirë të flaktë për të nxënë dije, shumë nxënës me prindërit e tyre, ua kanë mësyrë shkollave për t’u regjistruar.
Megjithatë, jo të gjithë do të kenë fatin të ulen sërish në bankat e shkollës, sepse respektimi i të drejtave dhe lirive kushtetuese në Kosovë, fatkëqësisht gjen zbatim selektiv.
Këto ditë, jam kontaktuar disa herë nga nxënëset që mbajnë shaminë e kokës. Ankohen se shkollat po refuzojnë të i regjistrojnë, nën arsyetimin se kinse, nuk lejohet mësimnxënia në shkollë me shami në kokë.
Po citohet një udhëzim administrativ i MASHT-it, për të mbështetur trajtimin e tillë joprofesional dhe poshtërues.
Institucionet e pushtetit ekzekutiv duhet të angazhohen në parandalimin e shkeljes së mëtejshme të së drejtës në arsim dhe të drejtës për manifestimin e fesë të vajzave në Kosovë, sic e parasheh Kushtetuta në nenet 38(2) dhe 48(2).
Këto institucione, gjatë hartimit të akteve nënligjore të tyre, duhet të respektojnë në plotni dispozitën e nenit 55 të Kushtetutës, sipas të cilës “të drejtat dhe liritë kushtetuese mund të kufizohen vetëm me LIGJ” dhe jo me akte nënligjore sic janë Udhëzimet Administrative apo Rregulloret e qeverisë.
Zbatimi i dispozitës së Udhëzimit Administrativ të MASHT-it, që ka për qellim ndalimin e mbajtjes së shamisë së kokës në shkollë, përvec që nuk gjenë mbështetje në asnjë ligj dhe as në Kushtetutën tonë, shtron pyetjen e supremacisë kushtetuese në këtë vend. A thua qenka më e fuqishmë një dispozitë e aktit nënligjor se sa vet Kushtetuta jonë?!
Mënyra e veshjes është zgjedhje e lirë e secilit. Mënyra e veshjes mbrohet edhe me Lirinë e Shprehjes, sepse me veshje, përvec përkatësisë fetare, ne mund të shprehim shpirtin artistik, karakterin dhe preferencat tona si individë.
Prandaj, t’i lëmë anash teket ditore, e të anojmë kah respektimi i të drejtave, barazia dhe sundimi i ligjit. Vetëm kështu mund të ndërtojmë një shtet funksional e demokratik.
Diversiteti është vlerë e një shoqërie demokratike!
