Numri i të vdekurve nga tërmetet në Mianmar ka arritur në afër 2.900, ndërkohë 72 persona akoma mbeten të zhdukur në Tajlandë, transmeton Anadolu.
Sipas ekipit të informacionit të Këshillit të Administratës Shtetërore të Mianmarit, numri i të vdekurve në Mianmar ka arritur në 2.886, me 4.639 persona të plagosur dhe 373 akoma të zhdukur.
Në Tajlandën fqinje, siç raporton “Thai PBS”, 72 persona mbeten të zhdukur në kryeqytetin Bangkok, ndërsa kërkimi i trupave vazhdon në vendin e bllokut të shembur të kullës së Zyrës së Auditimit Shtetëror.
Të premten e kaluar, dy tërmete të fuqishme me magnitudë 7.7 dhe 6.4 tronditën Mianmarin dhe Tajlandën, me epiqendër në rajonin Sagaing ku raportohet se pësoi më shumë dëme.
Ekipet tajlandeze të shpëtimit dhe ato ndërkombëtar u angazhuan gjatë gjithë natës, duke punuar me qentë nuhatës dhe pajisje të rënda për të ngritur blloqe të mëdha betoni për të arritur tek personat e zhdukur.
Një zyrtar i shpëtimit pranoi se ekipet janë të kufizuara në numrin e makinerive të rënda që mund të vendosin njëkohësisht, pasi duke vepruar kështu mund të rrezikojnë zhvendosjen e mbeturinave të mëdha dhe të groposura.
Rreth 100 punëtorë ishin brenda ndërtesës së kullës së Zyrës Shtetërore të Auditimit në Bangkok kur ajo u shemb të premten si pasojë e dridhjeve nga tërmeti i fuqishëm pranë rajonit Mandalay të Mianmarit fqinj.
Disa vende kanë ofruar ndihmë për Mianmarin për të përballuar sfidat e paraqitura nga tërmetet. Së fundmi, Japonia njoftoi se ishte gati të japë 6 milionë dollarë ndihmë urgjente për viktimat e tërmetit.
