Në Rripin e Gazës, i cili është shënjestër i sulmeve të dhunshme të Izraelit nga ajri, toka dhe deti për më shumë se 10 muaj, numri i të vdekurve ka kaluar 40 mijë dhe nuk ka mbetur asnjë vend bosh në varreza, raporton Anadolu.
Banorët e Gazës që duan të varrosin të afërmit e tyre që u vranë në sulmet izraelite kanë vështirësi të gjejnë varre bosh. Thuhet se në varrezat në shumë rajone nuk ka hapësirë boshe, veçanërisht në pjesën qendrore të Rripit të Gazës.
Oficeri i varrezave, Saad Hasan Bereket, i cili punon në varrezat e Suvejfit në qytetin e Gazës, për Anadolu tha se ai e kishte kaluar jetën në varreza, por nuk kishte hasur kurrë në një situatë të tillë.
– Varret në tre shtresa
Bereket tha se derisa para luftës bënin disa varrime në ditë, pas 7 tetorit varrosnin 70, 80, 100, e ndonjëherë edhe 300 kufoma në ditë.
Duke shpjeguar se tre trupa u varrosën në një varr në varrezat e Suvejfit, Bereket tha: “Vështirësia është se nuk kishte mbetur vend për të hapur varret, kështu që unë ndërtova varr mbi varr. Ky vend përbëhet nga tre shtresa varresh, jo një apo dy”.
Bereket deklaroi se më parë kishte parë 9 varreza në rajon dhe tha: “Unë mund të hyj në varrezat e Ensarëve dhe Suvejfëve. Ka bombardime kudo, hyj në varrezat ku ka njerëz. Bombardimet vazhdojnë ditë e natë”.
Dëshmorët varrosen në varreza masive dhe nuk paguhet asnjë tarifë për ta. Bereket tha se ata që kërkojnë varr të shkëputur duhet të paguajnë afërsisht 300 shekel.
– “Në rajonin qendror të Gazës ka tre varreza dhe ato janë plot”.
Muhamed Abdullah, një nga palestinezët që u detyruan të migrojnë nga kampi i refugjatëve Nusairat, deklaroi se ka vështirësi të mëdha në varrosje për shkak të sulmeve të vazhdueshme.
Duke theksuar se varrezat tani janë plot për shkak të numrit të madh të viktimave në sulmet izraelite, Abdullah tha: “Numri i dëshmorëve po rritet vazhdimisht në mënyrë të frikshme. Në masakrën më të vogël bien 10 apo 20 dëshmorë. Në të ashtuquajturin rajon qendror (në Rripin e Gazës) ka vetëm 3 varreza dhe janë përplot”.
Ai theksoi se kanë dashur të hapin varret për 8 kufomat e fundit, por në varreza janë gjetur trupa të varrosur më parë dhe se kanë pasur vështirësi të mëdha në gjetjen e hapësirës së zbrazët për shkak të dendësisë në varreza.
– “(Në varreza) Nuk ka vend bosh, ka njerëz të zhvendosur në hapësirat boshe”
Duke theksuar se varrezat mbushen jo vetëm me të vdekurit, por edhe nga të gjallët, Abdullah tha: “Nuk ka vend ku të hapen varreza të reja, sepse ka shumë të zhvendosur që janë strehuar nëpër varreza”.
Ai tërhoqi vëmendjen për pafuqinë që po përjetojnë.
Abdullah thotë se numri i kufomave që sjellin për varrim është i frikshëm. “Sulmet vazhdojnë pa ndalë, ka 40 mijë dëshmorë si dhe të zhdukur. Nuk ka vend bosh (në varreza) dhe ka njerëz që janë zhvendosur në zonat e zbrazëta”, shtoi ai.
