Komisioneri i Përgjithshëm i UNRWA-së, Philippe Lazzarini, ka ngritur alarmin për situatën e rëndë humanitare në Rripin e Gazës, duke deklaruar se asnjë ndihmë humanitare nuk ka hyrë në enklavë prej më shumë se tre javësh, për shkak të bllokadës së plotë nga forcat izraelite.
“Kjo është periudha më e gjatë që Gaza ka mbetur pa furnizime që nga fillimi i luftës,” paralajmëroi Lazzarini. “Gjatë armëpushimit, 500–600 kamionë ndihma mbërrinin çdo ditë. Tani, asgjë.”
Ndërkohë, fëmijët po vuajnë nga uria, të sëmurët dhe të plagosurit janë pa ilaçe, dhe çmimet e produkteve bazë janë rritur në nivele alarmante në mbarë Gazën.
“Bllokada duhet të hiqet dhe kalimet kufitare duhet të rihapen për të lejuar një fluks të rregullt ndihmash humanitare dhe furnizimesh tregtare,” theksoi ai.
Situata në Gaza po përshkallëzohet çdo ditë, ndërsa organizatat ndërkombëtare të ndihmës po bëjnë thirrje për veprim urgjent për të shmangur një katastrofë edhe më të madhe humanitare.
