Të paktën 15 persona humbën jetën ndërsa shumë të tjerë u plagosën në sulmet që ushtria izraelite kreu në qytetet Tyre (Sur) dhe Nabatieh në jug të Libanit, transmeton Anadolu.
Siç raporton agjencia zyrtare libaneze e lajmeve NNA, avionët luftarakë izraelitë goditën një qendër që i përket Institucionit Shëndetësor Islamik të lidhur me Hezbollahun në zonën Arabsalim të Nabatieh.
Në sulm humbën jetën 6 punonjës shëndetësorë.
Po ashtu 8 persona humbën jetën dhe shumë të tjerë u plagosën në sulmet që ushtria izraelite kreu në qendër të qytetit Nabatieh dhe zonat përreth saj.
Bëhet e ditur se në sulmet izraelite në rajonin Bint Jbeil në jug të vendit ka humbur jetën një person që po mblidhte ullinj.
Në një deklaratë mbrëmë nga Ministria libaneze e Shëndetësisë u njoftua se 11 persona humbën jetën dhe 48 të tjerë u plagosën në sulmet që ushtria izraelite kreu në zona të ndryshme të qytetit Tyre.
