Çlirimi i Mekës është një nga ngjarjet më madhështore në historinë islame, një fitore jo vetëm ushtarake, por edhe shpirtërore dhe morale.
Më 20 Ramazan të vitit 8 hixhri (630 m.), Muhamedi alejhi salatu ve selam (paqja dhe bekimet e Allahut qofshin mbi të) hyri në Mekë me 10,000 sahabë, duke vulosur fundin e idhujtarisë dhe triumfin e Islamit.
Por ajo që e bëri këtë çlirim të veçantë nuk ishte forca e armëve, por mëshira dhe falja.
Muhamedi alejhi salatu ve selam, pas viteve të persekutimit nga kurejshët, nuk kërkoi hakmarrje.
Përkundrazi, ai tha fjalët historike: “Sot nuk ka qortim për ju! Shkoni, jeni të lirë!”.
Në atë ditë, idhujt u rrëzuan nga Qabja, dhe e vërteta triumfoi mbi errësirën.
Ky çlirim nuk ishte vetëm për Mekën, por edhe për zemrat e njerëzve, një kujtesë se fitorja më e madhe është fitorja mbi urrejtjen dhe padrejtësinë.
Meka e ndershme u pastrua nga idhujt, dhe zemrat u mbushën me dritën e besimit.
Çlirimi i Mekës na mëson:
• Se mëshira është më e fortë se hakmarrja.
• Se fitorja e vërtetë është ajo e shpirtit mbi egon.
• Se Islami është fe e paqes, drejtësisë dhe faljes.
Pse pikërisht në Ramazan ?!
Ramazani është një mundësi e artë për t’u çliruar nga errësira e mëkateve dhe për ta ndriçuar shpirtin me dritën e besimit.
Është koha për të thyer zinxhirët e vesit, për të pastruar zemrën me pendim dhe për të mbushur shpirtin me dashuri e mëshirë.
Në këtë muaj, Allahu na fton të bëhemi më të mirë, të falim dhe të jemi më afër Tij.
Përfundim
Le të çlirohemi nga pesha e së shkuarës, le të na rrjedhin lotët e pendimit dhe le të ndjejmë dashurinë e Zotit që na mbush shpirtin.
Ky muaj është mundësia më e mirë për të rifilluar, për t’u çliruar nga të ligat, për të dashur më shumë dhe për të qenë më afër Allahut të Madhëruar !
Hoxhë Sadik Avdiu
