Arsenal ka shënuar fitore në kuadër të xhiros së 12 të Ligës Premier.
Gunnersat kanë triumfuar para shikuesve të vetë në stadiumin “The Emirates” kundër Tottenham Hotspurs me rezultat 2-0.
Vendasit dominuan gjatë gjithë pjesës së parë të takimit, por hasën në mbrojtjen e fortë të mysafirëve deri dhjetë minuta para përfundimit të 45 minutshit të parë.
Ishte Shkodran Mustafi, ai i cili realizoi gol me kokë në 35 minutë pas një harkimi të Mesut Ozilit.
Pesë minuta më vonë pas një kombinimi të mirë mes Alexandre Lacazettes dhe Alexis Sanchezit, ky i fundit ngriti epërsinë në dy gola.
Edhe pjesa e dytë rezultoi me aksione të shpejta dhe lojë të bukur, por nuk u realizua asnjë gol i vetëm.
Në 45 minutshin e dytë rastin më të mirë e pati golashënuesi i dytë Sanchez, i cili dështoi para portierit Hugo LLoris në të 75 minutë.
Megjithëse në sekondat e fundit Sanchez ishte sërish para portierit të Tottenhamit, takimi përfundoi në dobi të Arsenalit me rezultat 2-0.
Pas kësaj, Arsenali zë pozitën e pestë të renditjet tabelore të ligës elitare angleze me 22 pikë ndërsa Spursat pozicionohen të tretit me 23 pikë.
Theksojmë se takimin e radhës “Topçinjtë” do ta luajnë si mysafirë të Burnleyt gjersa Tottenham e pret West Bromwich Albionin. /Telegrafi/
