Ministri i Komunikimit i Izraelit, Shlomo Karhi, i shoqëruar nga kolonët që pushtuan tokat palestineze, bastisi dje xhaminë Al-Aksa në Kudsin Lindor të pushtuar, raporton Anadolu.
Karhi kreu ritualet në një nga tunelet nën Murin Perëndimor, të njohur gjithashtu si Muri Al-Buraq ose “Muri i Vajtimit”, teksa edhe komentoi bastisjen në X.
“Në këto ditë kur ushtria izraelite po arrin fitore në të gjitha frontet, më kujtohen (tekstet fetare hebraike) Midrash që thonë: ‘Në të ardhmen, portat e Kudsit do të arrijnë në portat e Damaskut”, u shpreh ai.
Hamasi lëshoi një deklaratë duke dënuar bastisjen e ministrit Karhi dhe i përshkroi deklaratat e tij si “të rrezikshme”.
Në deklaratë theksohet se akti i tij i bastisjes së xhamisë Al-Aksa me kolonët e paligjshëm izraelitë dhe komentet e tij konfirmojnë “ambiciet dhe aspiratat e entitetit kolonial për tokat arabe” dhe theksojnë agresionin e tij ndaj vendeve të rajonit dhe njerëzve të tyre.
Duke u bërë thirrje vendeve arabe dhe muslimane për t’u bashkuar kundër “politikave pushtuese izraelite” dhe për të kundërshtuar planet dhe sulmet e vazhdueshme të Izraelit, Hamasi bëri thirrje për veprime efektive për të ndaluar gjenocidin e vazhdueshëm të Izraelit kundër palestinezëve në Rripin e Gazës.
– “Status quo”-ja në lidhje me Xhaminë Al-Aksa
Jordania konsiderohet si vendi përgjegjës për çështjet fetare në Kuds, në përputhje me Marrëveshjen “Wadi Araba” të nënshkruar me Izraelin në vitin 1994.
Sipas marrëveshjes së nënshkruar mes mbretit Abdullah II të Jordanisë dhe presidentit palestinez Mahmoud Abbas në vitin 2013, e drejta për mbrojtjen dhe kujdestarinë e Kudsit dhe vendeve të shenjta atje sërish iu dha Jordanisë.
Sipas marrëveshjes, xhamia Al-Aksa është nën kujdesin e Administratës së Vakëfeve Islame të Kudsit e cila është e lidhur me Ministrinë e Vakëfeve, Çështjeve Islame dhe Vendeve të Shenjta të Jordanisë.
Hebrenjtë të cilët më parë vizitonin xhaminë Al-Aksa me lejen e Administratës së Vakëfeve Islame të Kudsit, që nga viti 2003 e deri më sot, nën shoqërimin e policisë hyjnë në vendet e shenjta në kuadrin e vendimit të njëanshëm të Izraelit i cili shkel sovranitetin e Administratës së Vakëfeve.
Qeveria izraelite mbron idenë se po ruhet “status quo”-ja historike ku në xhaminë Al-Aksa “mund të kryejnë adhurime vetëm muslimanët dhe anëtarët e feve të tjera mund të kryejnë vetëm vizita”.
Por, kolonët fanatikë hebrenj janë kapur shpesh në kamera duke u lutur dhe duke kryer rituale fetare gjatë bastisjeve që ata kryejnë në Al-Aksa nën mbrojtjen e policisë izraelite.
