Ministri i Jashtëm sirian, Asaad al-Shaibani, iu drejtua për herë të parë Këshillit të Sigurimit të Kombeve të Bashkuara të premten, duke shpallur përfundimin e regjimit të Bashar al-Assad.
Ai i bëri thirrje komunitetit ndërkombëtar të mbështesë “Sirinë e re”.
“Kam nderin t’ju drejtohem në këtë ditë historike, dita kur para kësaj deklarate, flamuri që përfaqëson Sirinë e re, Sirinë e lirisë dhe dinjitetit, u ngrit në shtizën e Kombeve të Bashkuara së bashku me 193 partnerët tanë ndërkombëtarë,” deklaroi al-Shaibani.
Duke e përshkruar regjimin e mëparshëm të Assadit si përgjegjës për “dekada mizorish”, ai theksoi: “Vendi u zhyt në errësirë, qytetarët u vranë, u torturuan dhe u zhdukën sistematikisht. U përdorën armë kimike. Miliona njerëz u shpërngulën dhe breza të tërë u thyen nën peshën e dhimbjes dhe humbjes.”
Al-Shaibani tha se Siria tashmë është e hapur ndaj botës, duke lejuar aksesin e institucioneve ndërkombëtare dhe duke planifikuar krijimin e një Komisioni për Drejtësi Tranzitore.
“Avionët tani hedhin lule në vend të bombave fuçi,” theksoi ai.
Ministri bëri thirrje për heqjen e sanksioneve ekonomike ndaj Sirisë, duke theksuar se këto masa e kanë detyruar vendin të mbijetojë si “një vend i varur nga ndihmat” dhe kanë mundësuar lulëzimin e “rrjeteve të paligjshme”.
Al-Shaibani gjithashtu dënoi sulmet ajrore izraelite në territorin sirian, duke i cilësuar si “një kërcënim të drejtpërdrejtë për stabilitetin rajonal” dhe kërkoi nga Këshilli i Sigurimit të ushtrojë presion mbi Izraelin për të zbatuar marrëveshjen e ndarjes së vitit 1974.
“Le të shfrytëzojmë këtë moment vendimtar,” përfundoi ai, duke shtuar se “sirianët janë gati të formësojnë të ardhmen e vendit të tyre.”
Izraeli ka zhvilluar një fushatë intensive ajrore kundër objekteve ushtarake siriane që nga rënia e regjimit të Assadit në dhjetor.
Në fillim të dhjetorit, ushtria izraelite pushtoi zonën e demilitarizuar në Lartësitë Golan, duke shkelur marrëveshjen e vitit 1974 me Sirinë dhe duke zgjeruar kontrollin mbi këtë territor, pjesën më të madhe të të cilit Izraeli e ka mbajtur të pushtuar që nga lufta e Lindjes së Mesme e vitit 1967.
Bashar al-Assad, që udhëhoqi Sirinë për gati 25 vjet, u arratis në Rusi më 8 dhjetor, duke shënuar fundin e regjimit të Partisë Baath, në pushtet që nga viti 1963.
