Në Ditën Ndërkombëtare të Vullnetarëve “Let’s Do It Kosova”, njëra ndër organizatat që realizon aktivitete të ndryshme mjedisore vullnetare, ka shpallur vullnetarët e vitit 2020.
Në mesin e këtyre vullnetarëve është edhe Mihana Goga Bekteshi nga departamenti i Gruas në Këshillin e Bashkësisë Islame në Obiliq.
Mihana u vlerësua lartë për punën dhe angazhimet e saj vullnetare gjatë kohës së pandemisë.
“Një aktiviste shembull nga komuna e Obiliqit në fushën e ruajtjes dhe mbrojtjes së mjedisit. Mihanen e kemi prezente pothuajse në çdo aktivitet tonin mjedisor, e ajo nuk ndalon së kontribuari edhe duke vetëorganizuar aksione vetëdijësuese të pastrimit e duke i bërë pjesë të këtyre organizimeve edhe akterët relevantë të komunës prej nga vjen”, u tha sot në ceremoninë e ndarjes së mirënjohjeve.
Dita Ndërkombëtare e Vullnetarizmit është ditë e caktuar nga Asambleja e Përgjithshme OKB-së në vitin 1985 dhe u dedikohet të gjithë atyre vullnetarëve të shumtë anembanë botës, të cilët sakrifikojnë interesat e tyre personale, në interes të shoqërisë dhe komunitetit.
