“Nënë, baba, nëse vdes, më falni”, shkroi palestinezi 10-vjeçar Azmi Abu Al-Shaar në telefonin e tij para se të vritej në një sulm ajror izraelit që goditi shtëpinë e familjes së tij gjatë luftës gjenocidale izraelite në Gaza që zgjati 15 muaj, raporton Anadolu.
Familja e tij së fundmi zbuloi porosinë në telefon, të cilën ai nuk arriti ta dërgojë kurrë, duke zbuluar mesazhin prekës i cili pasqyron realitetet e zymta të luftës, duke përfshirë vdekjen, shkatërrimin dhe humbjen e njerëzve të dashur.
Shënimi i shkruar më 19 mars 2024 pasqyron vetëdijen e një fëmije për vdekjen e tij mes shkatërrimit të shtëpive dhe vrasjes së grave dhe fëmijëve.
“Paqja qoftë mbi ju. Nëse vdes, më falni, mami, babi dhe vëllezërit e motrat e mi Naeema, Shahed, Merjem dhe Mahmud. Mami dhe babi, më vjen shumë keq nëse ju mërzita ndonjëherë. Ndjej sikur nuk kam shumë kohë”, thuhej në mesazhin e shpërndarë gjerësisht në rrjetet sociale.
Azmi vazhdoi: “Mami, të lutem kujdesu për Mahmudin. Naeema, me fal që të shqetësova. Shahed, Maryam, Mahmud, më vjen keq për të gjithë ju. Betohem se ju dua të gjithëve, gjyshen, gjyshin, xhaxhallarët e mi dhe të gjithë. Shpresoj që të më falni”.
Gjenocidi izraelit në Gaza mori jetën e 17.861 fëmijëve, sipas statistikave të fundit nga zyra qeveritare për media në Gaza.
Gjatë luftës, shumë fëmijë shkruanin emrat e tyre në krahët dhe trupat e tyre për të ndihmuar shpëtimtarët t’i identifikonin ata në rast se vriteshin, një pasqyrim tragjik i tmerreve në të cilat kalojnë banorët më të rinj të Gazës.
Marrëveshja e armëpushimit në Gaza hyri në fuqi më 19 janar dhe pezulloi luftën gjenocidale të Izraelit që ka vrarë rreth 47.300 palestinezë, kryesisht gra dhe fëmijë, dhe ka plagosur afro 111.500 të tjerë që nga 7 tetori 2023.
Marrëveshja prej tre fazash përfshin një shkëmbim të të burgosurve dhe ndërprerje të armiqësive, duke synuar një armëpushim të përhershëm dhe tërheqjen e forcave izraelite nga Gaza.
Sulmi izraelit e ka lënë Gazën në gërmadha dhe banorët e saj të zhvendosur dhe të uritur.
Gjykata Ndërkombëtare Penale lëshoi urdhrarreste në nëntor të vitit të kaluar për kryeministrin izraelit Benjamin Netanyahu dhe ish-ministrin e mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me padi për gjenocid në Gjykatën Ndërkombëtare të Drejtësisë për luftën e tij në enklavë.
