Arsyeja e rritjes së përkohshme të sigurisë në bazën e forcave ajrore të NATO-s në qytetin perëndimor gjerman Geilenkirchen ishte informacioni i inteligjencës për një kërcënim të mundshëm nga një akt sabotazhi rus, transmeton Anadolu.
Agjencia Gjermane e Shtypit (DPA) citoi qarqet gjermane të sigurisë që thanë se kishte pasur një indikacion serioz nga një shërbim inteligjent i huaj “për veprime përgatitore për një akt të mundshëm sabotimi rus kundër bazës së NATO-s përmes përdorimit të një droni”.
Javën e kaluar, niveli i dytë më i lartë i sigurisë ishte në fuqi për pothuajse 24 orë për shkak të një kërcënimi të mundshëm në bazën e NATO-s në North Rhine-Westphalia. Pasi nuk ndodhi asgjë, masat e sigurisë u ulën pasditen e së premtes në nivelin që aplikohej më parë, i ashtuquajturi nivel Bravo+.
Më parë, të gjithë punonjësit jo thelbësorë ishin dërguar në shtëpi për shkak të informacionit të shërbimit sekret. Në zhargonin e NATO-s, niveli i dytë më i lartë i sigurisë, Charlie, do të thotë se ka ndodhur një incident ose ka prova që mund të ndodh një formë e veprimit terrorist kundër aleancës.
Alarm sigurie për shkak të kërcënimit terrorist
Aeroporti i NATO-s në Geilenkirchen është baza kryesore për avionët specialë Awacs, të cilët përdoren kryesisht për të monitoruar hapësirën ajrore në zonën e aleancës lindore. Me strukturën e tyre të radarit në formë kërpudhash, këto avionë janë në gjendje të lokalizojnë dhe identifikojnë avionë të tjerë më shumë se 400 kilometra larg.
Sipas një zëdhënësi të paidentifikuar të NATO-s, rreth 1.600 njerëz janë angazhuar zakonisht në aeroportin e NATO-s. Megjithatë, aktualisht ka shumë më pak, pasi nga e hëna, avionët Awacs janë nisur vetëm nga dy aeroporte, në Türkiye dhe Norvegji.
Sfondi i zhvendosjes nuk është situata e kërcënimit, por një ndërprerje e planifikuar në operacionet në Geilenkirchen për arsye organizative, tha NATO.
Ndërkohë, zëdhënësi i Ministrisë gjermane të Mbrojtjes, Arne Collatz, nuk deshi të komentojë raportin mbi planet e mundshme të sulmit rus kundër bazës ajrore në Gjermani. Sipas tij, deri më tani në hapësirën ajrore mbi aeroport nuk është vërejtur asnjë dron.
Sipas raportimeve të mediave, tashmë kishte një gjendje të rritur gatishmërie për shkak të kërcënimit të terrorizmit në korrik në bazat ushtarake amerikane në Gjermani dhe vende të tjera evropiane.
Në atë kohë, Pentagoni gjithashtu kishte shpallur nivelin e dytë më të lartë të sigurisë, Charlie, raportoi transmetuesi amerikan CNN, duke cituar dy përfaqësues të paidentifikuar të qeverisë. Natyra e kërcënimit të supozuar mbeti e paqartë.
Në korrik, shërbimi sekret i brendshëm i Gjermanisë paralajmëroi për një rritje të aktiviteteve të supozuara sabotuese ruse në Evropë dhe tha se ka indikacione se shërbimet e inteligjencës ruse po vlerësojnë në mënyrë specifike profilet e mediave sociale të punonjësve të kompanive gjermane.
“Qëllimi thuhet se ka qenë identifikimi i njerëzve që mund të jenë të ndjeshëm ndaj përpjekjeve ruse për të ndikuar apo inicuar”, thuhet në një shënim aktual sigurie nga Zyra Federale për Mbrojtjen e Kushtetutës.
Shtrirja e akteve të sabotimit rus në Evropë varet nga zhvillimi i situatës në luftën në Ukrainë dhe nga zhvillimi i konfliktit midis Rusisë dhe Perëndimit, sipas agjencisë gjermane të shtypit.
Sulmet kibernetike në faqet e internetit
Në të njëjtën kohë, sipas agjencisë gjermane të shtypit, sulmet kibernetike nga hakerët pro-rusë vazhdojnë të zbulohen në faqet e internetit të autoriteteve dhe kompanive gjermane. Deri më tani, efektet e sulmeve të tilla zakonisht kanë qenë të kufizuara në kohë dhe faqet e internetit të prekura kanë qenë vetëm përkohësisht të padisponueshme.
Në vende të tjera evropiane janë duke u hetuar disa raste të zjarrvënieve apo tentativave për zjarrvënie. Po vijojnë hetimet edhe për vandalizëm dhe veprimtari propagandistike.
Muajin e kaluar, agjencitë amerikane të inteligjencës zbuluan se qeveria ruse kishte planifikuar të vriste shefin ekzekutiv të një prodhuesi të fuqishëm gjerman të armëve që raportohet se ka prodhuar predha artilerie dhe automjete ushtarake për Ukrainën.
