Mbrojtja Civile në Gaza ka lëshuar një mesazh të fortë drejtuar komunitetit ndërkombëtar, duke denoncuar vdekjen e shumë civilëve të plagosur nën rrënojat e shtëpive të tyre, për shkak të mungesës së pajisjeve për shpëtim.
“Shumë të plagosur janë vrarë nën rrënojat e shtëpive të tyre, të cilat u shkatërruan nga okupimi izraelit mbi kokat e tyre, pa asnjë paralajmërim,” thuhet në deklaratën e publikuar në kanalin zyrtar në Telegram të institucionit.
Ekipet e Mbrojtjes Civile theksojnë se nuk kanë mundur të shpëtojnë jetët e tyre për shkak të pengesave të vendosura nga Izraeli, i cili nuk lejon hyrjen e pajisjeve të rënda dhe makinerive për kërkim-shpëtim në Rripin e Gazës, ndërkohë që “bota hesht në mënyrë alarmante”.
Organizata, e cila ka humbur shumë punonjës në sulmet izraelite, raportoi se ekipet e saj të shpëtimit kanë hasur raste të shumta në Shujayea, Abasan, Rafah dhe Deir el-Balah, ku dëgjonin thirrjet për ndihmë nga të plagosurit nën rrënoja, por nuk kanë mundur t’i shpëtojnë.
“Sot, ata nuk janë gjë tjetër veçse trupa të zhdukur,” thuhet në deklaratë. “Ende pyesim: Kur do të ndalet vdekja në Rripin e Gazës? Dhe deri kur do të zgjasë ky dështim ndërkombëtar?”
