Vizitorët evropianë në Mbretërinë e Bashkuar tani do të kenë nevojë për një leje të hyrjes të zbatuar online në kuadër të rregulloreve të reja të udhëtimit të paraqitura nga qeveria britanike, transmeton Anadolu.
Sistemi i Autorizimit Elektronik i Udhëtimit (ETA), i cili është në fuqi nga sot, synon të rrisë sigurinë kufitare dhe të thjeshtojë proceset e hyrjes.
Shefi i Forcave Kufitare të Mbretërisë së Bashkuar, Phil Douglas, e përshkroi sistemin si një “masë të sigurisë kufitare” dhe theksoi se nuk pritet asnjë ndërprerje e madhe pas fillimit të saj.
ETA zbatohet për shtetasit nga rreth 30 vende evropiane, përfshirë të gjitha vendet anëtare të Bashkimit Evropian (BE), përveç Irlandës.
– Si funksionon sistemi ETA
Sistemi ETA është i lidhur në mënyrë digjitale me pasaportën e aplikantit dhe lejon qëndrime deri në gjashtë muaj.
Procesi i aplikimit, i disponueshëm përmes aplikacionit për telefona të mençur ose faqes së internetit të qeverisë së Mbretërisë së Bashkuar, zgjat rreth 10 minuta dhe kërkon një fotografi pasaporte dhe imazhin e fytyrës. Vendimet zakonisht merren brenda pak minutash.
Leja është e detyrueshme për të gjithë udhëtarët, përfshirë foshnjat dhe fëmijët, por ata që kalojnë transit nëpër Mbretërinë e Bashkuar janë të përjashtuar. Ky përjashtim u paraqit pasi aeroporti “Heathrow” ngriti shqetësime për humbjen e numrit të pasagjerëve.
ETA nuk kërkohet për banorët e Mbretërisë së Bashkuar ose individët me një status ekzistues imigrimi në Mbretërinë e Bashkuar.
Mbretëria e Bashkuar paraqiti sistemin ETA vitin e kaluar për shtetasit amerikanë, kanadezë dhe të tjerë të përjashtuar nga viza ndërsa paraqitja e sotme është pjesë e një plani më të gjerë për shtrirjen e sistemit për vizitorët nga e gjithë bota.
