Të paktën 100 persona, përfshirë 20 fëmijë dhe 9 punonjës ndihme, u vranë gjatë një sulmi dyditor të kryer nga forcat paramilitare RSF dhe milicitë aleate në kampet e zhvendosurve Zamzam dhe Abu Shorouk, si dhe në qytetin el-Fasher në Darfur, njoftoi OKB-ja.
Sipas koordinatorës humanitare të OKB-së, Clementine Nkweta-Salami, sulmet ndodhën të premten dhe të shtunën. Spitali i organizatës Relief International në kampin Zamzam u godit, duke shkaktuar vdekjen e stafit mjekësor, përfshirë mjekun Mahmoud Babaker Idris dhe drejtuesin rajonal Adam Babaker Abdallah.
Sulmet ndodhën në një prej zonave ku është konfirmuar uria ekstreme. Rreth 25 milionë njerëz në Sudan përballen me krizë humanitare. OKB e cilësoi këtë si një përshkallëzim të papranueshëm të dhunës kundër civilëve dhe punonjësve humanitarë.
