Ministria e Shëndetësisë e Maqedonisë së Veriut konfirmoi 2 raste të reja të vdekjeve nga koronavirusi i ri (COVID-19) me çka numri i përgjithshëm i të vdekurve në vend është rritur në 51, transmeton Anadolu Agency (AA).
Ministria njoftoi se në 24 orët e fundit janë regjistruar 37 raste të reja me COVID-19 me çka numri i përgjithshëm i pacientëve të diagnostifikuar me koronavirus në vend arrin në 1.207.
Gjatë 24 orëve të fundit janë regjistruar gjithsej 15 pacientë të shëruar me çka numri i pacientëve të shëruar nga COVID-19 në Maqedoninë e Veriut arrin në 179.
Sipas njoftimit të Ministrisë së Shëndetësisë, gjatë 24 orëve të fundit janë kryer 314 teste. Me këtë që nga paraqitja e epidemisë në vend janë kryer gjithsej 11.870 teste për COVID-19.
Kujtojmë se Qeveria e Maqedonisë së Veriut solli vendim për kufizimin e lëvizjes së qytetarëve gjatë kohës së fundjavës, përfshirë edhe të hënën, gjegjësisht nga e premtja, 17 prill nga ora 16:00 deri të martën, 21 prill në orën 05:00, në territorin e gjithë vendit për shkak të festave të Pashkëve.
