Kosova është shpërblyer nga Asociacioni i Komiteteve Olimpike Kombëtare (ANOC) me çmimin për Depërtimin më të Mirë të Komitetit Olimpik pas triumfit të Majlinda Kelmendit në Lojërat Olimpike “Rio 2016”.
Në ceremoninë ANOCAwards 2016 janë shpërblyer nëntë shtete që për herë të parë fituan medalje të arta në “Rio 2016” në mesin e të cilave u zgjodh edhe Kosova me xhudisten Majlinda Kelmendi.
“Sonte Kosova merr shpërblimin më të madh në histori si ‘Breakthrough National Olympic Comittee’ të Lojërave Olimpike duke iu falënderuar medaljes së artë të Majlindës në Rio ’16!”, ka shkruar në Facebook trajneri i xhudos Driton Kuka.
Ai ka postuar një fotografi në të cilën shihet me Majlindën, Besim Hasanin, kryetar i Komitetit Olimpik të Kosovës dhe me presidentin e Federatës Ndërkombëtare të Xhudos, Marius Vizer.
