Pasi ka thënë se Serbia dhe serbët duhet ta dinë se Asociacioni i Komunave me shumicë Serbe nuk do të ketë kompetenca ekzekutive dhe se nuk do të jetë pushtet i tretë në Kosovë, Ulrike Lunaçek mbrëmë në Vjenë ka folur edhe për pesë shtetet e BE-së që ende nuk e kanë njohur Kosovën.
Raportuesja për Kosovën në Parlamentin Evropian në Vjenë në takimin e “Miqve të Kosovës” ka thënë se nga këto pesë vende, njohja më e vështirë për Kosovën do të jetë nga Spanja.
“Fakti që pesë shtete nuk e kanë njohur Kosovën është diçka që më nervozon mua dhe atë që është absurd. Kur flas me spanjollët, ata më thonë se janë të shqetësuar se mënyra në të cilën Kosova u nda nga Serbia mund të ketë efekt mbi Kataloninë. Megjithatë, asnjë qeveri demokratike që nga Franko në Spanjë nuk u ka bërë katalonasve atë çfarë Sllobodan Millosheviqit u ka bërë shqiptarëve në Kosovë”, ka thënë Lunaçek, transmeton lajmi.net.
Spanjollët ishin, sipas saj, ata që ishin marrë për muaj të tërë me çdo detaj të tekstit të Marrëveshjes së Stabilizim Asociimit edhe pse në BE ka më shumë probleme se një mosmarrëveshje në lidhje me atë nëse në tekst shkruan shteti apo kombi, dhe të ngjashme.
Kur jemi te katër vendet e tjera, veçanërisht Sllovakisë dhe Greqisë, Lunaçek ka thënë se ato kanë “një pozitë interesante” sepse ato kanë ambasada në Prishtinë, lëshojnë vizave Shengen në pasaportat kosovare dhe gjithashtu kanë shkëmbim të deputetëve dhe ministrave.
Ajo vuri në dukje se 111 shtetet anëtare të OKB-së e kanë njohur Kosovën dhe se anëtarësimi kërkon rekomandimin e Këshillit të Sigurimit, që është i vështirë për shkak të Kinës dhe Rusisë.
“Kishte përpjekje që të hyhet përmes UNESCO-s. Unë mendoj se shumë kosovarë besuan tepër se ata që e kanë njohur pavarësinë do të votojnë për pranim, e që nuk do të lëshon pe para presionit diplomatik. Por Serbia e ka një shërbim shumë të fortë diplomatik. Në qoftë se ndërmerret një përpjekje e re, për shembull për anëtarësim në Këshillin e Evropës, duhet të planifikohet mirë”, tha Lunaçek.
Kur bëhet fjalë për liberalizimin e vizave, ajo përkujtoi se Kosova ka përmbushur 95 nga 97 kushtet, duke përfshirë edhe kërkesat për më shumë dënime për korrupsion dhe krim të organizuar si dhe marrëveshjen e demarkacionit me Malin e Zi.
