Zgjerimi i ofensivës ushtarake izraelite po bëhet me synimin për të “ripushtuar Gazën” ose të paktën pjesë të saj, sipas Gideon Levy, një kolumnist i medias izraelite Haaretz.
“Askush nuk mund ta marrë seriozisht pretendimin izraelit se kjo [rinisje e luftës] do të sjellë lirimin e pengjeve. Sepse tashmë e dimë që presioni ushtarak nuk i shpëton pengjet,” tha Levy për Al Jazeera, duke folur nga Tel Avivi.
Ai shtoi se lufta është “horrifikuese dhe e frikshme”, ndërsa bisedimet për armëpushim nuk kanë sjellë asnjë rezultat, dhe Izraeli nuk mund të ndalet për shkak të mbështetjes nga SHBA.
“Jemi në një situatë dëshpërimi. Një luftë që vazhdon pa asnjë qëllim. Dhuna vazhdon pa ndonjë qëllim të qartë. Njerëz të pafajshëm vriten çdo ditë,” tha ai.
“Unë nuk shoh një fund. Si do të përfundojë? Hamasi nuk do të dorëzohet sepse nuk ka asgjë për të humbur. Dhe Izraeli nuk mund të ndalet.” /mesazhi
