Presidenti amerikan Joe Biden tha të hënën se lufta e Izraelit në Rripin e Gazës së rrethuar “duhet të përfundojë”, ndërsa numri i të vdekurve palestinezë në enklavën bregdetare ka kaluar 43.000.
“Na duhet një armëpushim. Kjo luftë duhet të përfundojë,” tha presidenti në deklarata të shkurtra për gazetarët pasi hodhi votën e tij të hershme në garën presidenciale të vitit 2024 në shtetin e tij të Delawerit.
Ai tha se do të zhvillonte një telefonatë për të “vazhduar përpjekjet për armëpushim” pasi të largohej nga qendra e votimit në qytetin New Castle.
Autoritetet shëndetësore në Gaza thanë të hënën se numri i konfirmuar i të vdekurve në enklavën bregdetare ka tejkaluar 43.000 ndërsa mbi 101.000 të tjerë janë plagosur. Shumica e të vdekurve janë gra dhe fëmijë.
Lufta e Izraelit në Gaza ka zhvendosur gati të gjithë popullsinë civile mes një bllokade të vazhdueshme që ka shkaktuar mungesa të rënda ushqimi, uji të pastër dhe të ilaçeve.
Përpjekjet e ndërmjetësimit të udhëhequra nga ShBA-ja, Egjipti dhe Katari për të arritur një marrëveshje për armëpushim dhe shkëmbim të të burgosurve midis Izraelit dhe Hamasit kanë dështuar për shkak të refuzimit të kryeministrit izraelit Benjamin Netanyahu për të ndalur luftën.
Izraeli gjithashtu përballet me një padi gjenocidi në Gjykatën Ndërkombëtare të Drejtësisë për veprimet e tij në enklavën palestineze.
