Emisari i Bashkimit Evropian për dialogun Kosovë-Serbi, Miroslav Lajçak, ka thënë se konkluzioni i tij nga bisedimet në Beograd dhe Prishtinë është se procesi i dialogut vazhdon dhe se gjithçka duhet të përmbushet siç është rënë dakord.
“Çështja kryesore ose parimi i gjithë këtij procesi është që në fund të fundit të mos ketë çështje të hapura ose të pazgjidhura. Kemi të bëjmë me çështje që nuk kanë qenë në negociata deri më tani dhe ato që kanë qenë, por nuk janë përmbushur”, citohet të ketë thënë Lajçak, shkruajnë mediat serbe, përcjell Telegrafi.
Po sipas mediave serbe, ai ka thënë se për të është e kuptueshme që këto janë çështje të vështira që provokojnë emocione, por se kryesore është që për gjithçka që u ra dakord të përmbushet.
Sidoqoftë, ai nuk specifikoi nëse gjithçka që është rënë dakord në marrëveshjen e Brukselit duhet të përmbushet para ose pas arritjes së një marrëveshje përfundimtare.
Dhe tani, siç ka shtuar ai, kemi të bëjmë me çështje serioze dhe të ndjeshme, siç është edhe ajo e Asociacionit të Komunave Serbe.
“Sa i përket Asociacionit të Komunave Serbe, është rënë dakord, nënshkruar dhe duhet të realizohet. Hapi tjetër është të negociojmë statusin e atij komuniteti… Dhe vendi ku ne do t’i zhvillojmë ato negociata do të jetë në Bruksel”, ka thënë më tej Lajçak.
Ai tha se para mbërritjes së tij në Prishtinë, kishte njoftime dhe deklarata të ndryshme, por që në 25 takime, aq sa kishte, askush nga bashkëbiseduesit e tij nuk tha që ata nuk do të përmbushnin detyrimet e tyre.
“Në fakt, u tha qartë në të gjitha takimet se ajo që pranuam dhe premtuam duhet të përmbushet, përfshirë AKS-në”.
Ndërsa kur bëhet fjalë për çështjen e Kushtetutës (së Kosovës), ai thotë se pozicioni i BE-së është të negociojë procese kaq serioze dhe se është logjike që edhe Kushtetuta do të duhet të ndryshohet.
“Dhe askush nuk tha që është e pamundur, kushtetuta nuk është Bibla. Nëse biem dakord për çështje serioze, atëherë natyrisht që ajo duhet të pasqyrohet në Kushtetutë”, ka thënë ndër tjerash Lajçak.
