Detaje të reja vijojnë të zbulohen nga historianët sa i përket faktit se cili arriti i pari në Amerikën e Veriut. Deri më tani e kemi ditur që ka qenë Kristofor Kolombi, por mesa duket para tij pati njerëz të tjerë që shkelën atë tokë.
Studimi më i fundit thotë se vikingët patën një koloni në Amerikën e Veriut, ekzaktësisht 1 mijë vjet më parë, ose më saktë disa shekuj para se atje të shkonte Kolombi.
Shkencëtarët thonë se një teknikë e re e analizimit të rrathëve të pemës nxorri dëshminë se vikingët pushtuan një vend në Neëfoundland të Kanadasë në vitin 1021. Historikisht njihet se europianët e arritën Amerikën me mbërritjen e Kolombit në Botën e Re në vitin 1492.
Kjo është hera e parë që kërkuesit flasin për data fikse. Në studimin e publikuar në revistën Nature, shkencëtarët thonë se analizuan rrathët e pemëve në disa pemë në vendbanimin në L’Anse aux Meadows.
Ata shprehen se përdorën një sinjal radiokarboni atmosferik të prodhuar nga një stuhi diellore si referencë dhe nga kjo mundën që të nxirrnin datën e saktë se kur u pre pema dhe kjo përkonte me vitin 1021.
Sipas shkencëtarëve një stuhi diellore ka ndodhur në vitin 992. L’Anse aux Meadows i përket trashëgimisë botërore dhe mbrohet nga Unesco. Ky është vendbanimi i parë dhe i vetëm që është vendosur nga Vikingët në Amerikën e Veriut dhe prova se europianët arritën më herët në Botën e re./tvklan.al
