Këshilli i Sigurimit i OKB-së miratoi njëzëri të premten një rezolutë që zgjat mandatin e Forcës Vëzhguese të Shkëputjes së OKB-së (UNDOF) në lartësitë e Golanit për gjashtë muaj të tjerë.
Rezoluta, e paraqitur bashkërisht nga Rusia dhe ShBA-ja, mori mbështetjen e të 15 anëtarëve të Këshillit.
Me miratimin e rezolutës, mandati i UNDOF-it, i cili duhej të përfundonte më 31 dhjetor, u zgjat deri më 30 qershor 2025.
Rezoluta theksoi nevojën që Izraeli dhe Siria të përmbushin plotësisht Marrëveshjen e Shkëputjes së Forcave të vitit 1974, e cila synon ta ruajë armëpushimin dhe stabilitetin në rajon.
Më tej, theksohej se në zonën e ndarjes nuk duhet të zhvillohet asnjë aktivitet ushtarak, përveç personelit të UNDOF-it.
Duke shprehur shqetësim të thellë për tensionet e vazhdueshme në Lindjen e Mesme, rezoluta u bëri thirrje të gjitha palëve të ushtrojnë përmbajtje dhe të bashkëpunojnë plotësisht me UNDOF-in për të parandaluar përshkallëzimin.
Në rezolutë u nënvizua gjithashtu rëndësia e adresimit të rreziqeve për paqeruajtësit, duke përfshirë municionet e pashpërthyera dhe sigurimin e burimeve të përshtatshme dhe masave të sigurisë për misionin.
Si pjesë e rezolutës, Sekretarit të Përgjithshëm të OKB-së Antonio Guterres iu kërkua të raportonte çdo 90 ditë për zbatimin e rezolutës dhe situatën në rajon.
Marrëveshja e shkëputjes
E nënshkruar më 31 maj 1974, marrëveshja përcakton tërheqjen e Izraelit nga të gjitha zonat e malit Hermon që kishte pushtuar gjatë Luftës Arabo-Izraelite të vitit 1973, si dhe një zonë prej rreth 25 kilometra katrorë (9.6 milje katrorë) që përfshinte Kuneitrën dhe lokacione të tjera.
Marrëveshja përcakton kufirin aktual midis Izraelit dhe Sirisë së bashku me marrëveshjet ushtarake shoqëruese, duke krijuar dy linja ndarëse – izraelite (blu) dhe siriane (e kuqe) – me një zonë tampon midis tyre.
Marrëveshja monitorohet nga UNDOF-i, e cila ka për detyrë të ruajë armëpushimin midis Izraelit dhe Sirisë pas luftës së vitit 1973.
Që nga viti 1974, UNDOF-i ka patrulluar zonën tampon midis zonave të kontrolluara nga Izraeli dhe Siria.
Izraeli pushtoi pjesën më të madhe të Lartësive të Golanit gjatë luftës së Lindjes së Mesme të vitit 1967 dhe më vonë e aneksoi territorin në një lëvizje që nuk u njoh kurrë nga komuniteti ndërkombëtar.
