Kryeministri i Greqisë, Kyriakos Mitsotakis, zbuloi sot atë që ai e quajti “transformimin më drastik në historinë e forcave të armatosura të vendit”, duke njoftuar një investim prej 25 miliardë eurosh në një strategji të re të mbrojtjes kombëtare, raporton Anadolu.
Duke iu drejtuar parlamentit, Mitsotakis tha se strategjia do të mbështetet në dy shtylla kryesore: integrimin e teknologjive të avancuara dhe përfshirjen aktive të industrisë vendase të mbrojtjes të Greqisë.
“Tani kemi të bëjmë me një luftë të ndryshme nga ajo që dinim, të paktën atë për të cilën forcat e armatosura ishin potencialisht të gatshme për ta zhvilluar”, tha Mitsotakis.
“Mjetet pa pilot, municionet bredhëse, dronët… përdorimi i inteligjencës artificiale dhe theksi mbi sulmet kibernetike, të gjitha këto janë teknologji që tani duhet të integrohen në planifikimin afatgjatë të forcave të armatosura”, shtoi ai.
Ai theksoi rëndësinë e “vlerës së shtuar greke”, duke vënë në dukje se kompanitë vendase të mbrojtjes do të marrin pjesë në të gjitha programet e ardhshme të Ministrisë së Mbrojtjes.
Zyrtarët grekë kanë vënë në dukje sukseset e mëdha në vitet e fundit të industrisë së mbrojtjes në Türkiyen fqinje, e cila ka reduktuar nevojën për armë të importuara dhe sisteme mbrojtëse dhe ka tërhequr blerës në nevojë nga vende të tjera.
Mitsotakis përmendi gjithashtu sfida më të gjera gjeopolitike, duke përfshirë marrëdhëniet e tensionuara SHBA-BE, paqëndrueshmërinë në Lindjen e Mesme dhe luftën e vazhdueshme në Ukrainë si arsye të mëtejshme për të modernizuar aftësitë ushtarake të Greqisë.
Ai tha se forcimi i parandalimit, gatishmërisë dhe aftësive luftarake të forcave të armatosura është një përparësi kryesore për qeverinë e tij.
