Ministri izraelit i Punëve të Jashtme, Gideon Sa’ar, ka bërë të ditur se është bërë përparim i rëndësishëm në negociatat indirekte me Hamasin për një marrëveshje për shkëmbimin e të burgosurve, transmeton Anadolu.
“Është bërë përparim, ne shohim një përparim në negociata”, tha Sa’ar në një konferencë për media në Kuds me homologun e tij danez, Lars Løkke Rasmussen.
Sa’ar tha se Izraeli po punon me SHBA-në për të arritur një marrëveshje pengjesh.
“Ka përparim, thashë se duket shumë më mirë se më parë. Së shpejti do të dimë nëse pala tjetër dëshiron të njëjtën gjë”, tha ministri izraelit.
Megjithatë, ai nuk pranoi të japë një afat kohor për arritjen e një marrëveshje.
“Nuk dua të them më shumë se kaq, sepse e kuptoj se ka familje që janë të ndjeshme ndaj çdo fjale dhe çdo fjalie”, shtoi ai.
Sipas faqes së internetit të lajmeve ‘Ëalla’, Izraeli është në prag të finalizimit të një marrëveshjeje të mundshme të shkëmbimit të të burgosurve me Hamasin.
Duke cituar dy zyrtarë izraelitë të paidentifikuar dhe një burim të huaj, media izraelite tha se Izraeli dhe ndërmjetësit kanë arritur një marrëveshje për një projekt-marrëveshje për lirimin e pengjeve të mbajtur në Gaza dhe një armëpushim në enklavën palestineze, e cila i është paraqitur Hamasit.
Burimet pohuan se “ndërmjetësuesit janë në pritje të përgjigjes së Hamasit ndaj projekt-marrëveshjes”, me sa duket duke u përpjekur t’i hedhë përgjegjësinë grupit palestinez.
Burimet gjithashtu sugjeruan se përgjigja e Hamasit mund të vijë brenda 24 orëve të ardhshme.
“Duket se jemi në rrugën drejt një marrëveshjeje”, tha një nga burimet.
Lidhur me raportin deri më tani nuk ka pasur asnjë koment nga Hamasi.
Izraeli aktualisht mban më shumë se 10.300 të burgosur palestinezë, ndërsa vlerësohet se 99 izraelitë mbahen peng në Gaza. Hamasi tha se shumë pengje izraelite janë vrarë në sulmet ajrore pa dallim nga Izraeli.
Bisedimet për shkëmbimin e të burgosurve dhe armëpushimin, të ndërmjetësuara nga Katari, Egjipti dhe SHBA-ja, janë ndërprerë disa herë për shkak të kushteve të reja të vendosura nga kryeministri izraelit, Benjamin Netanyahu.
Opozita izraelite dhe familjet e pengjeve akuzojnë Netanyahun se po pengon përpjekjet për të arritur një marrëveshje armëpushimi dhe shkëmbimi të të burgosurve në Gaza me Hamasin.
Që nga 7 tetori i vitit 2023, ushtria izraelite vazhdon me luftën gjenocidale në Gaza që ka vrarë të paktën 46.600 palestinezë, shumica prej tyre gra dhe fëmijë, pavarësisht rezolutës së Këshillit të Sigurimit të OKB-së që bën thirrje për një armëpushim të menjëhershëm.
Në muajin nëntor, Gjykata Penale Ndërkombëtare lëshoi urdhër-arreste për Netanyahun dhe ish-ministrin e Mbrojtjes, Yoav Gallant, duke i akuzuar për krime lufte dhe krime kundër njerëzimit në Gaza.
Izraeli për luftën brutale në enklavën palestineze gjithashtu përballet me një çështje gjenocidi në Gjykatën Ndërkombëtare të Drejtësisë.
