Rusia po monitoron nga afër “situatën alarmante” të fluksit të emigrantëve në kufirin Bjellorusi-Poloni dhe u bën thirrje palëve të marrin përgjegjësitë e tyre, deklaroi zëdhënësi i Kremlinit, Dmitry Peskov, raporton Anadolu Agency (AA).
“Shpresojmë që situata në kufirin Bjellorusi-Poloni të mos evoluojë deri aty sa të kërcënojë sigurinë e Rusisë”, u tha Peskov gazetarëve në Moskë.
Moska dhe Minsku janë në kontakt të vazhdueshëm për situatën “përmes të gjitha kanaleve të mundshme, duke përfshirë shërbimet speciale”, shtoi zëdhënësi i Kremlinit.
“Kemi shkëmbim informacioni. Por e përsëris edhe një herë, ky është një problem, një problem real, që ka të bëjë me Bjellorusinë dhe Poloninë në këtë rast. Dhe, natyrisht, ne jemi shumë të shqetësuar për këtë”, theksoi Peskov.
Ai shtoi se më e rëndësishmja në këtë situatë është jeta dhe shëndeti i numrit të madh të njerëzve që janë grumbulluar në kufi.
– Lavrov fajëson Perëndimin për krizën e emigrantëve dhe kërkon shmangien e standardeve të dyfishta
Në një deklaratë të veçantë, ministri i Jashtëm rus, Sergej Lavrov, akuzoi Perëndimin për krizën e emigrantëve.
Në një konferencë shtypi në Moskë pas një takimi me Kryepeshkopin Paul Richard Gallagher, sekretar për marrëdhëniet me shtetet i Selisë së Shenjtë, Lavrov tha se situata aktuale është rezultat i konflikteve dhe luftërave të nisura nga Perëndimi në Lindjen e Mesme dhe Afrikën e Veriut në një përpjekje për të imponuar vizionin e tij për jetën.
“Kështu u bombardua Iraku me pretendime të rreme, si u shkatërrua shteti në Libi dhe si u kryen sulmet në Siri. Të gjitha këto dhe aventura të tjera të kolegëve tanë perëndimorë kanë shkaktuar flukse të paprecedentë refugjatësh. Me të gjitha hapat që janë duke u marrë dhe diskutuar tani, ne nuk duhet të harrojmë se ku filloi gjithçka dhe për faj të kujt po ndodh tani”, tha ai.
Prandaj, përgjegjësia kryesore për zgjidhjen e krizës së emigrantëve është e atyre që krijuan kushtet që ajo të shpërthejë, theksoi ai.
Lavrov tha se duhet të ketë standarde të unifikuara në lidhje me pritjen e refugjatëve.
“Dje, në diskutimet e shkencave politike, ata rikujtuan se kur refugjatët vinin nga Turqia në BE, BE-ja ndau fonde që ata të qëndronin në Turqi. Pse është gjithashtu e pamundur të ndihmohen bjellorusët që kanë nevoja në mënyrë që refugjatët, të cilët Polonia dhe Lituania nuk lejojnë të hyjnë në territorin e tyre në asnjë mënyrë, të jetojnë në kushte normale?” pyeti ai.
Nga ana e tij, Gallagher u bëri thirrje autoriteteve në mbarë Evropën që të marrin përgjegjësinë dhe të zgjidhin “këtë krizë shumë serioze humanitare”.
“Sa i përket qëndrimit të Selisë së Shenjtë, ne e dimë, për shembull, se peshkopi i Polonisë u përball me njëfarë refuzimi të qëndrimit të tij nga autoritetet”, tha ai.
Më pas, kryepeshkopi kërkoi që situata të shikohet nga pikëpamja e fatit të njerëzve që përballen me një situatë shumë të rëndë.
Ai gjithashtu pranoi se ka nga ata që janë përgjegjës për këtë situatë, duke thënë se “ata duhet të marrin përgjegjësinë e tyre”.
Nga ana tjetër, shërbimi për shtyp i Kremlinit tha se presidenti rus, Vladimir Putin, shkëmbeu mendime në lidhje me situatën e emigrantëve në kufijtë Bjellorusi-Poloni dhe Bjellorusi-Lituani me homologun e tij bjellorus, Alexander Lukashenko.
