Kompania Moderna do të aplikojë për autorizimin e vaksinën kundër COVID-19

Firma amerikane e bioteknologjisë Moderna sot tha se efikasiteti i vaksinës së saj kundër koronavirusit të ri (COVID-19) është 94,1 për qind pas provës klinike të fazës së tretë, duke shtuar se menjëherë do të aplikojë për Autorizimin e Përdorimit Emergjent për vaksinën, transmeton Anadolu Agency (AA).

Nga kompania thonë se analiza kryesore e efikasitetit të studimit të fazës së tretë të vaksinës së saj kundër koronavirusit është kryer në 196 raste të konfirmuara me COVID-19, nga të cilat 30 raste ishin të rënda.

Kompania gjithashtu tha se do të aplikojë në Administratën e Ushqimit dhe Barnave (FDA) për Autorizimin e Përdorimit Emergjent për vaksinën dhe miratimin me kusht nga Agjencia Evropiane e Barnave.

“Në 196 rastet me COVID-19 ishin 33 persona më të moshuar, të moshës mbi 65 vjeç, si dhe 42 pjesëmarrës të identifikuar nga komunitete të ndryshme”, thuhet në kumtesën e kompanisë.

Sipas drejtorit ekzekutiv të kompanisë Moderna, Stephane Bancel, vaksina e kësaj kompanie gjithashtu ka aftësinë për të parandaluar sëmundjen e rëndë COVID-19.

“Ne besojmë se vaksina jonë do të sigurojë një mjet të ri dhe të fuqishëm që mund të ndryshojë rrjedhën e kësaj pandemie dhe të ndihmojë në parandalimin e sëmundjeve të rënda, hospitalizimin dhe vdekjen”, shtoi ai.

Duke theksuar se Moderna po punon me Qendrën Amerikane për Kontrollin e Sëmundjeve dhe Operacionit “Warp Speed” të administratës së presidentit amerikan Donald Trump, Bancel tha se rreth 20 milionë doza të vaksinës së saj do të jenë në dispozicion në SHBA deri në fund të vitit 2020 dhe kompania ka në plan të prodhojë 500 milionë deri në 1 miliardë doza në vitin 2021.