Komandanti i KFOR-it, Ozkan Ulutas, ka takuar të mërkurën shefin e Shtabit të Përgjithshëm të Forcave të Armatosura të Serbisë, Milan Mojsiloviq, në Beograd.
Gjatë takimit është folur edhe për sigurinë në Kosovë.
Mojsiloviq ka thënë se situata “është e paqëndrueshme dhe e ndjeshme”, gjë për të cilën ka fajësuar institucionet e Kosovës. Siç ka pretenduar ai para Ulutashit, institucionet e Republikës së Kosovës kanë synim “ndryshimin e strukturës etnike në veri të Kosovës”.
Qeveria e Kosovës ka marrë një numër vendimesh në veri. Mbyllja e institucioneve paralele serbe atje pati nxitur reagim nga Serbia. Këto institucione vlerësohen të jashtëligjshme e kundërkushtetuese, megjithatë Serbia e ka quajtur veprimin “përndjekje të serbëve”.
Reagim ka nxitur edhe të bashkësia ndërkombëtare, e cila e ka kritikuar Kosovës për veprime të njëanshme dhe të pakoordinuara.
Policia e Kosovës pati mbyllur edhe nëntë objekte të Postës së Serbisë në Mitrovicë të Veriut, Leposaviq, Zveçan dhe në Zubin-Potok.
Komandanti i KFOR-it Ulutash përfundon angazhimin e tij njëvjeçar në tetor dhe në vend të tij do të jetë Enrico Barduani, gjeneralmajor italian.
