Kolegji Zgjedhor i Shteteve të Bashkuara të Amerikës (SHBA) konfirmoi fitoren elektorale të presidentit të sapozgjedhur Joe Biden ndaj presidentit në largim Donald Trump, raporton Anadolu Agency (AA).
Biden tejkaloi pragun e nevojshëm prej 270 votash, duke siguruar votat në përputhje me rezultatet elektorale në territoret e shteteve.
Hawaii mbetet shteti i vetëm që ende nuk ka dhënë votat e tij, ndërsa Biden kryeson me 302 vota kundër Trumpit, i cili ka 232 vota, sipas raporteve të shumta. Biden pritet të shtojë katër votat e Hawaiit për të arritur numrin përfundimtar të pritur prej 306 votash.
Megjithëse është e mundur që një kandidat të sigurojë presidencën ndërsa humbet votën popullore, siç bëri Trump në vitin 2016, këtë vit Biden tejkaloi totalin e Trump me rreth 7 milionë vota.
Mbledhja e Kolegjit Zgjedhor është zakonisht një formalitet që nuk vërehet shumë dhe është një hap kryesisht procedural në rrugën drejt Ditës së Përurimit. Por refuzimi i Trumpit për të pranuar rezultatet dhe akuzat e përsëritura të pabaza për mashtrim të gjerë të votuesve i dhanë kolegjit një rëndësi shtesë këtë vit.
Hapi tjetër procedural do të zhvillohet më 6 janar kur Kongresi mblidhet në një seancë të rrallë të përbashkët për të numëruar zyrtarisht votat e Kolegjit Zgjedhor.
Biden u konsiderua fituesi i garës së Shtëpisë së Bardhë më 7 nëntor, katër ditë pas ditës së zgjedhjeve, kur mediat e shpallën atë fitues pasi ai kapërceu pragun prej 270 votash.
