Historiani kosovar Shkodran Imeraj përmes një reagimi për media thotë se pretendimet e drejtuesve të Kishës Ortodokse në Kosovë dhe qëndrimi politik i zëvendëskryeministrit të Kosovës, Branimir Stojanoviq, në lidhje me zhvillimet e fundit rreth kishës në kampusin e Universitetit të Prishtinës, janë të papranueshme dhe provokime të hapura ndaj stabilitetit shoqëror dhe politik në Kosovë.
“I rikujtojmë të dy palëve fetare dhe politike serbe në Kosovë se ky objekt është ndërtuar në kundërshtim me planet urbanistike të Prishtinës dhe në periudhën e viteve 90-ta të shekullit të kaluar, kur në Kosovë çdo mekanizëm politik drejtohej e udhëhiqej nga politika shoviniste e Beogradit”, thuhet në reagimin e Imerajt.
Prandaj, sipas Imerajt, si e tillë, kisha në kampusin e UP-së duhet të zhvendoset nga aty, sepse në asnjë vend të botës në hapësirat universitare laike nuk hasim objekte kulti.
“Çështja në fjalë nuk duhet të politizohet nga qarqe të caktuara dhe të instrumentalizuara serbe, sepse në Kosovë në fund të fundit nuk pranohet privilegjimi i një komuniteti të caktuar fetar, siç është komuniteti fetar ortodoks serb, i cili në vazhdimësi është treguar jo konstruktiv dhe jo realist në pikëpamje të zhvillimeve politike që kanë ndodhur në Kosovë gjatë viteve 90-ta të shekullit XX. Komuniteti në fjalë duhet të zhvishet nga petku i politikës ditore dhe t’i shërbejë paqes dhe stabilitetit të përgjithshëm në Kosovë”, thuhet në fund të reagimit të Imerajt.
