Njëzet palestinezë, duke përfshirë dhjetë fëmijë, u vranë dhe disa të tjerë u plagosën herët të dielën në sulmet ajrore izraelite në veri dhe jug të Gazës në ditën e parë të Fitër Bajramit.
Dëshmitarët thanë për Anadolu se sulmet ajrore izraelite shënjestruan shtëpi, tenda dhe automjete civile në Qytetin e Gazës, në Jabalia në veri dhe në Khan Younis në jug.
Shtatëmbëdhjetë persona, përfshirë tetë fëmijë, u vranë kur sulmet izraelite goditën disa zona, përfshirë shtëpinë e një familjeje në Bani Suheila, në lindje të Khan Younisit, dhe një tendë që strehonte familje të zhvendosura në Qizan Raswan, në jug të qytetit, sipas burimeve mjekësore.
Tanket dhe artileria izraelite gjithashtu goditën zonat lindore të Abasan al-Kabiras, në lindje të Khan Younisit, me të shtëna me armë zjarri që goditën shtëpi banimi, shtuan ata.
Në Qytetin e Gazës, një palestinez u vra dhe të tjerë u plagosën kur avionët luftarakë izraelitë shënjestruan tri automjete civile në lagjen Tuffah, thanë mjekët.
Në Gazën veriore, dy vajza u vranë dhe disa të tjera u plagosën pasi avionët luftarakë izraelitë bombarduan shtëpinë e familjes Maqbel në zonën Jurn të Jabalias, shtuan ata.
Në mes të bombardimeve të pamëshirshme izraelite, qindra mijëra palestinezë në Gaza falën namazin e Fitër Bajramit mbi rrënojat e xhamive të shkatërruara, në strehimoret e të shpërngulurve dhe pranë rrënojave të shtëpive të tyre.
Ushtria izraelite nisi një fushatë të befasishme ajrore në Rripin e Gazës më 18 mars, duke vrarë 920 njerëz dhe duke plagosur afro 2.000 të tjerë, pavarësisht marrëveshjes së armëpushimit dhe shkëmbimit të të burgosurve që u arrit në janar.
Më shumë se 50.200 palestinezë janë vrarë, kryesisht gra dhe fëmijë, dhe mbi 114.000 janë plagosur në sulmet brutal ushtarake izraelite në Gaza që nga tetori i vitit 2023.
Gjykata Ndërkombëtare Penale lëshoi urdhra arresti nëntorin e kaluar për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një çështje gjenocidi në Gjykatën Ndërkombëtare të Drejtësisë për luftën e tij në enklavën palestineze.
