Ushtria izraelite edhe në ditën e tretë të Bajramit ka kryer sulme në pjesë të ndryshme të Rripit të Gazës, raporton Anadolu.
Si pasojë e sulmit që ushtria izraelite kreu ndaj një vendbanimi në qytetin Khan Younis, humbën jetën gazetari Mohammad Saleh Al-Bardawil, gruaja dhe fëmijët e tij.
Banorët e rajonit vëzhguan ndërtesën e shkatërruar si pasojë e sulmit dhe mblodhën sendet që mund të përdoren.
Ndërkohë ekipet e mbrojtjes civile, filluan punimet e kërkim-shpëtimit nën rrënojat e ndërtesës që u shkatërrua si pasojë e sulmit.
Pas armëpushimit që hyri në fuqi më 19 janar në Rripin e Gazës, ushtria izraelite rifilloi sulmet e saj të dhunshme mëngjesin e 18 marsit.
Mbi 1.000 palestinezë janë vrarë dhe 2.359 të tjerë janë plagosur në sulmet që ushtria izraelite rifilloi në Rripin e Gazës pas prishjes së armëpushimit më 18 mars.
Numri i palestinezëve të vrarë nga sulmet e Izraelit në Rripin e Gazës që nga 7 tetori 2023 është rritur në 50.357 ndërsa numri i të plagosurve në 114.400.
Thuhet se në Rripin e Gazës nën rrënoja ka ende mijëra të vdekur.
