Qeveria izraelite po avancon një projektligj që do të ndalonte shfaqjen e flamurit palestinez në universitete dhe institucione të financuara nga Izraeli, thanë sot mediat lokale, transmeton Anadolu.
Nëse miratohet, ligji do të zbatohet për çdo institucion të financuar nga buxheti i shtetit, duke përfshirë universitetet, dhe do të vendosë gjoba deri në 10.000 shekelë (2.700 dollarë) dhe dënime me burg deri në një vit.
Sipas transmetuesit publik izraelit KAN, Komiteti Ministror i Knessetit për Legjislacionin do të diskutojë projektligjin gjatë seancës së tij të ardhshme të dielën.
Legjislacioni i propozuar, i paraqitur nga anëtari i Partisë Likud, Nissim Vaturi, synon të ndalojë shfaqjen e flamujve nga “shtetet armiqësore”, duke përfshirë flamurin palestinez, në institucionet e financuara nga publiku ose të financuara nga shteti.
Projektligji parashikon që tubimet që përfshijnë flamuj palestinezë mund të shpërndahen dhe demonstruesit që i tundin ata mund të përballen me një vit burg dhe një gjobë prej jo më pak se 10.000 shekelë.
Mbi 20 për qind e qytetarëve të Izraelit janë arabë dhe shumë qytetarë arabë ngrenë flamurin palestinez gjatë protestave kundër politikave izraelite në territoret e pushtuara palestineze.
Studentët arabë në universitetet izraelite organizojnë shpesh demonstrata kundër politikave të qeverisë, shpesh duke shfaqur flamuj palestinezë.
