Një dron izraelit ka goditur qytetin jugor të Libanit, Taybeh, raportojnë korrespondentët e Al Jazeera Arabic, në mes të një vale të re sulmesh që po rrezikojnë marrëveshjen e armëpushimit të arritur katër muaj më parë mes Izraelit dhe Hezbollahut.
Sipas Agjencisë Kombëtare të Lajmeve të Libanit, një person është plagosur rëndë pasi një dron goditi një punishte biçikletash në Taybeh.
Media palestineze raportoi gjithashtu se një dron ka goditur një automjet në të njëjtin qytet, duke publikuar imazhe që tregojnë re tymi që ngrihen mbi zonën e sulmuar.
Ky sulm ajror vjen vetëm disa ditë pasi ushtria izraelite bombardoi dy herë kryeqytetin libanez, Bejrutin.
Pavarësisht marrëveshjes për armëpushim të nënshkruar më 27 nëntor, sulmet në jug të Libanit kanë vazhduar, duke ngritur shqetësime serioze për përshkallëzimin e konfliktit në rajon. /mesazhi
