Autoritetet izraelite kanë ndërtuar shtatë vendbanime të paligjshme brenda Zonës B të Bregut Perëndimor, e cila supozohet të jetë nën kontrollin administrativ të Autoritetit Palestinez, tha të dielën një organizatë izraelite për të drejtat e njeriut, transmeton Anadolu.
Këto janë pikat e para të vendbanimeve të krijuara në Zonën B që nga nënshkrimi i Marrëveshjes së Oslos në vitin 1993. “Për herë të parë që nga Marrëveshja e Oslos, shtatë poste u krijuan në Zonën B të Bregut Perëndimor”, tha organizata izraelite “Paqe Tani” (Peace Now) në një deklaratë.
Organizata tha se “pesë nga postet u krijuan në zonën e quajtur ‘Rezerva e Dakorduar'” në lindje dhe juglindje të qytetit të Betlehemit ndërsa dy të tjerat në zonën e Ramallahut, të gjitha të klasifikuara si Zona B e Bregut Perëndimor.
Marrëveshja e Oslos II e vitit 1995 e ndau Bregun Perëndimor në tri zona: Zona A nën kontrollin e plotë palestinez, Zona B nën kontrollin civil dhe administrativ palestinez dhe kontrollin e sigurisë izraelite dhe Zona C nën kontrollin e plotë civil, administrativ dhe të sigurisë izraelite.
Të gjitha vendbanimet ilegale izraelite ndodhen në Zonën C të Bregut Perëndimor, e cila përbën 60 për qind të Bregut Perëndimor. Izraeli kufizon ashpër ndërtimin e palestinezëve në zonë dhe shkatërron gjerësisht shtëpitë palestineze atje me pretekstin e mungesës së një lejeje ndërtimi.
Organizata izraelite mbikëqyrëse kundër vendbanimeve ilegale vuri në dukje se “dhjetëra familje palestineze kanë lënë shtëpitë e tyre në Zonën B për shkak të dhunës së kolonëve”, duke hapur rrugën për ngritjen e vendbanimeve kolone në tokat e tyre.
“Në gjithë Bregun Perëndimor, një numër i paprecedentë prej 52 postesh u krijuan në vitin 2024. Shtatë postet në Zonën B përbëjnë 13.5 për qind të të gjitha posteve të vendosura vitin e kaluar”, tha organizata “Paqe Tani”.
Vlerësimet izraelite tregojnë se më shumë se 720 mijë izraelitë jetojnë tani në vendbanime kolone dhe poste ilegale në Bregun Perëndimor të pushtuar, përfshirë Kudsin Lindor. Ndërtimi i vendbanimeve është përshpejtuar ndjeshëm që kur qeveria e krahut të djathtë të Izraelit, e udhëhequr nga kryeministri Benjamin Netanyahu, erdhi në pushtet në dhjetor 2022.
Komuniteti ndërkombëtar, përfshirë OKB-në, i konsideron këto vendbanime kolone të paligjshme sipas ligjit ndërkombëtar. OKB-ja ka paralajmëruar vazhdimisht se zgjerimi i vazhdueshëm i vendbanimeve kërcënon qëndrueshmërinë e një zgjidhjeje me dy shtete, një kornizë që shihet si kyçe për zgjidhjen e konfliktit izraelito-palestinez.
Në një zhvillim të rëndësishëm ligjor në korrik, Gjykata Ndërkombëtare e Drejtësisë (GJND) nxori një vendim që e shpalli “të paligjshëm” pushtimin prej dekadash të territoreve palestineze nga Izraeli.
Gjykata bëri thirrje për evakuimin e menjëhershëm të të gjitha vendbanimeve ekzistuese në Bregun Perëndimor dhe Kudsin Lindor.
