Ushtria izraelite ka kërkuar nga palestinezët që jetojnë në disa zona të qytetit Rafah në jug të Rripit të Gazës, që të evakuojnë shtëpitë e tyre, transmeton Anadolu.
Zëdhënësi i ushtrisë izraelite, Avichay Adraee në një deklaratë në llogarinë e tij në X paralajmëroi palestinezët që të evakuojnë zonat e tyre në disa pjesë të qytetit Rafah në jug të Rripit të Gazës.
“Përsërisim paralajmërimin tonë urgjent për banorët e Gazës që jetojnë në pjesët lindore dhe perëndimore të qytetit Rafah, në qytezat Al-Nasr, Al-Shawka dhe në lagjet Al-Salam, Al-Manara dhe Qizan an-Najjar”, tha Adraee.
Ai theksoi se palestinezët që jetojnë në këto qyteza duhet të shkojnë urgjentisht në qendrat e strehimit në rajonin Al-Mawasi, në perëndim të qytetit Khan Younis.
Ushtria izraelite më 29 mars zgjeroi pushtimin e saj tokësor në jug të Rripit të Gazës.
– 90 për qind e 2.3 milionë palestinezëve në Rripin e Gazës janë zhvendosur
Ushtria izraelite gjatë sulmeve të saj që filluan më 7 tetor 2023 dhe që vazhduan deri në armëpushimin e arritur më 19 janar 2025, publikoi harta që përmbanin udhëzime për palestinezët që të zhvendosen brenda Gazës.
Sipas shifrave të OKB-së, 90 për qind e rreth 2.3 milionë palestinezëve në Rripin e Gazës janë zhvendosur të paktën në herë për shkak të sulmeve të ushtrisë izraelite.
Ushtria izraelite mëngjesin e 18 marsit rifilloi sulmet e saj të dhunshme ndaj Rripit të Gazës duke shkelur armëpushimin që hyri në fuqi më 19 janar.
