Forcat izraelite kanë bombarduar përsëri periferinë jugore të Bejrutit, Dahiyeh, një zonë e njohur si bastion i Hezbollahut.
Sipas raportimeve nga korrespondenti i Al Jazeera-s, sulmi ndodhi gjatë orëve të fundit dhe shkaktoi një shpërthim të fuqishëm. Ushtria izraelite ka konfirmuar se ka shënjestruar një ndërtesë ku, sipas saj, ndodhej një anëtar i Hezbollahut që ndihmonte një operativ të Hamasit për të kryer sulme kundër Izraelit.
Si pasojë e bombardimit, ndërtesa është shembur. Deri më tani janë raportuar tre viktima.
Ky është sulmi i dytë në tre ditë në Bejrut. Më 28 mars, Izraeli kreu një tjetër bombardim ndaj një ndërtese banimi, duke pretenduar se ajo ishte një qendër prodhimi e dronëve të Hezbollahut. Megjithatë, ky pretendim nuk është vërtetuar. Në atë sulm nuk pati viktima pasi Izraeli kishte dhënë një urdhër evakuimi paraprak.
Në sulmin e fundit, një urdhër i tillë nuk u dha dhe ndërtesa u godit drejtpërdrejt.
