Të paktën gjashtë ushtarë izraelitë kanë bërë vetëvrasje në muajt e fundit, zbuloi e përditshmja izraelite Yedioth Ahronoth, duke përmendur shqetësimin e rëndë psikologjik të shkaktuar nga luftërat e zgjatura në Rripin e Gazës dhe Libanin jugor si shkakun kryesor, transmeton Anadolu.
Hetimi sugjeron se numri aktual i vetëvrasjeve mund të jetë më i lartë, pasi ushtria izraelite nuk ka nxjerrë ende shifra zyrtare, pavarësisht një premtimi për t’i zbuluar ato deri në fund të vitit.
Raporti thekson një krizë më të gjerë të shëndetit mendor brenda ushtrisë izraelite. Mijëra ushtarë kanë kërkuar ndihmë nga klinikat ushtarake të shëndetit mendor ose psikologët në terren, ku afërsisht një e treta e të tyre shfaqin simptoma të çrregullimit të stresit post-traumatik (PTSD).
Sipas hetimeve, numri i ushtarëve që kanë pësuar trauma psikologjike mund të tejkalojë ata që pësuan lëndime fizike nga lufta.
E përditshmja citon ekspertët të thonë se shtrirja e plotë e kësaj krize të shëndetit mendor do të bëhet e qartë pasi të përfundojnë operacionet ushtarake dhe trupat t’i kthehen jetës normale.
Në mars, Lucian Tatsa-Laur, kreu i departamentit të shëndetit mendor të ushtrisë izraelite, tha për gazetën Haaretz se rreth 1.700 ushtarë kishin marrë trajtim psikologjik.
Që atëherë janë shfaqur raporte të shumta që tregojnë se mijëra trupa po vuajnë nga probleme të shëndetit mendor për shkak të luftimeve të zgjatura në Gaza dhe Libanin jugor.
Tensioni rajonal është përshkallëzuar për shkak të ofensivës brutale të Izraelit në Rripin e Gazës, ku ka vrarë mbi 44 mijë njerëz, kryesisht gra dhe fëmijë, që nga sulmi i Hamasit vitin e kaluar.
Gjenocidi në Gaza që vijon për vitin e dytë ka shkaktuar një dënim ndërkombëtar në rritje, me figura dhe institucione që i vlerësojnë sulmet dhe bllokimin e dërgesave të ndihmave si një përpjekje të qëllimshme për të shkatërruar një popullsi.
Izraeli gjithashtu përballet me padi për gjenocid në Gjykatën Ndërkombëtare të Drejtësisë për luftën e tij vdekjeprurëse në Gaza.
Në një vendim historik, Gjykata Ndërkombëtare Penale dje njoftoi se kishte lëshuar urdhër-arreste për kryeministrin izraelit Benjamin Netanyahu dhe ish-ministrin e mbrojtjes Yoav Gallant për krimet e luftës në territoret palestineze, përfshirë Gazën.
Konflikti është përhapur në Liban, ku Izraeli ka nisur sulme vdekjeprurëse në të gjithë vendin në një përshkallëzim pas përleshjeve ndërkufitare midis Izraelit dhe Hezbollahut që nga fillimi i luftës së Gazës.
