Ministri i Mbrojtjes së Italisë, Guido Crosetto ka ngritur shqetësimet për sulmet izraelite kundër misionit paqeruajtës të OKB-së në Liban (UNIFIL), duke bërë thirrje për përforcimin e forcave të OKB-së në vend, me rregulla të përditësuara të angazhimit, transmeton Anadolu.
Siç raporton agjencia e lajmeve ANSA, ministri i Mbrojtjes, Crosetto në Senat tha se “UNIFIL duhet të forcohet dhe forcat libaneze të bëhen më të besueshme” dhe për këtë sipas tij “duhet rregulla të reja angazhimi”.
Crosetto theksoi se Izraeli duhet të luajë rol në forcimin e paqeruajtësve të OKB-së, të cilët kanë nevojë për aftësi reale parandaluese për të parandaluar përdorimin e forcës. “Izraeli duhet të respektojë rregullat e ligjit ndërkombëtar dhe të mbrojë popullsinë civile, si në Gaza ashtu edhe në Liban, si dhe kontingjentin e OKB-së”, theksoi Crosetto.
Më tej, ai shtoi se thirrja e Izraelit që forcat e OKB-së të largohen nga zona kufitare do të minonte besueshmërinë e organizatës. Megjithatë, ai përmendi se planet e evakuimit janë përditësuar, janë testuar dhe janë gati për t’u zbatuar nëse është e nevojshme, duke marrë parasysh praninë e mbi 1 mijë ushtarëve italianë në misionin e OKB-së.
Rezoluta 1701 e OKB-së, e miratuar në vitin 2006, bën thirrje për ndërprerjen e armiqësive midis Libanit dhe Izraelit. Rezoluta gjithashtu krijon një zonë të çmilitarizuar midis lumit Litani dhe “Linjës së Kaltër”, kufirit libano-izraelit, me ushtrinë libaneze dhe forcat e UNIFIL-it që janë prania e vetme e armatosur e autorizuar.
Gjatë javës së kaluar, Izraeli vazhdimisht ka shënjestruar pozicionet e UNIFIL-it në Libanin jugor, duke shkaktuar dënim ndërkombëtar dhe frikë për planet e tij më të gjera ushtarake.
Sulmet ndaj paqeruajtësve të OKB-së po zhvillohen së bashku me sulmet ajrore izraelite në të gjithë Libanin kundër atyre që pretendon se janë objektiva të Hezbollahut. Që nga fundi i shtatorit, sulmi i intensifikuar izraelit në Liban ka vrarë mbi 1.500 njerëz, ka plagosur afër 4.500 të tjerë dhe ka shkaktuar zhvendosjen e të paktën 1.34 milion njerëzve.
Në përgjithësi, që nga tetori i vitit të kaluar, sipas shifrave zyrtare libaneze, numri i vdekjeve është mbi 13 mijë.
